Ambiente talk show ne’ebé realiza hosi FONGTIL, iha Caicoli,tersa (27/07). Imajen/Florêncio Miranda Ximenes

DILI, 28 jullu 2020 (TATOLI) –  Fórum Organizasaun Naun Govermentál Timor-Leste (FONGTIL) realiza tan talk show hodi diskute papél Governu liuhosi Ministériu Saúde (MS) atu kontinua implementa regra prevensaun no kombate surtu COVID-19 iha Timor-Leste.

“Hanesan ita hotu hatene katak ita-nia Estadu Emerjénsia hotu ona iha juñu, maibé surtu COVID-19 sei eziste iha mundu tomak, nune’e ita presiza hamutuk atu ezekutivu sira kontinua foti medida preventiva atu moras ne’e labele tama tan iha Timor-Leste,” tenik Prezidente Komisaun F ne’ebé trata asuntu Saúde, Seguransa Sosiál no Igualdade Jéneru, Noé da Silva Ximenes, iha talk show iha edifísiu FONGTIL, Caicoli, tersa ne’e.

Tópiku espesífiku ba dikusaun ne’e maka: “Papél Ministériu Saúde atu kontinua implementa regra COVID-19”, ne’ebé partisipa husi Deputadu Noé da Silva Ximenes, Reprezentante MS hosi Kordenadór Pilár-haat COVID-19, Doutór Frederico Bosco no Koordenadór Organizasaun Saúde ba Ema Hotu (SABEH), Andre Belo.

Deputadu Bankada Partidu Liberatasaun Populár (PLP) ne’e dehan, atu prevene presiza reforsa liña fronteira sira atu surtu ne’e labele kontamina tan mai Timor-Leste.

“Ami husu ba Ministériu Saúde atu kontinua tau-matan ba Polísia no forsa sira atu oferese fasilidade saúde ba sira, nune’e bele hala’o servisu ho di’ak iha pontu entrada sira no tenke serbisu hamutuk atu instala bee iha eskola hotu iha territóriu laran tomak,” nia sujere.

Sorin seluk, Koordenadór SABEH, Andre Belo, hateten nu’udar organizasaun saúde durante ne’e hala’o ona serbisu saúde no antedimentu ba komunidade iha área remota atubele prevene-an hosi COVID-19 liuhosi regra prevensaun hanesan distánsia sosiál, fase liman bebeik no uza máskara.

“Komunidade iha área remota no kapitál sira iha direitu hanesan atu hatene surtu COVID-19 no asaun atu halo prevensaun, SABEH fó nafatin informasaun ba komunidade atu halo prevensaun maski ita laiha kazu foun maibé iha nasaun barak sei eziste,” nia akresenta.

Nune’e mós, Xefe Departamentu Kontrolu Moras Naun Kontajioza no Koordenadór pilár-haat COVID-19, Frederico Bosco, hateten papél MS krusiál tebes desde Organizasaun Mundiál Saúde (OMS) deklara COVID-19 sai pandemia globál.

“Ministériu Saúde foti ona medida lubuk ida to’o tama iha faze Estadu Emerjénsia datoluk no termina ita kontinua nafatin nível vijilánsia liuhosi komisaun inter-setorál ida atu perevene no proteje rai ida ne’e no povu tanba atu kombate la’ós serbisu Ministériu Saúde nia mesak,” nia afirma.

Iha pilár balun ne’ebé OMS hatúr atubele enfrenta kualkér tipu pandemia globál hanesan koordenasaun liña ministeriál ho endentidade hotu, komunikasaun risku no envolvimentu komunidade iha asaun prevensaun COVID-19, vijilánsia iha pontu entrada no konfinamentu obrigatóriu ba sidadaun sira hosi nasaun afetadu.

Nia mós refere kona-ba bee ba eskola sira, MS no MEJD presiza fó rekezitu baziku atu reativa eskola sira ho kondisaun iha bee fase-liman no alunu iha aula labele barak tanba presiza halo distansiamentu sosiál no uza máskara atu prevene COVID-19.

Ho nune’e, Frederico Bosco husu ba sidadaun hotu atu kontinua asegura medida hosi OMS no MS ba distansiamentu sosiál, uza maskára no fase liman bebeik ne’ebé hanesan luta koletivu atu kombate surtu COVID-19 iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here