Primeiru-Ministru, Taur Matan Ruak, hamutuk ho Membru Governu sira partisipa aprezentasaun relatóriu ba aplikasaun Estadu Emerjénsia, iha sala plenáriu PN, tersa (28/07). Imajen Tatoli/Egas Cristovão

DILI, 28 jullu 2020 (TATOLI)—Diretór Institutu Defeza Nasionál (IDN) no Kapitaun Mar e Guerra, Donanciano Costa Gomes “Pedro Klamar Fuik”, hateten Sentru Integradu no Jestaun Krize (CIGC-sigla portugés) to’o fim jullu ezekuta ona fundu COVID-19 ho 61.4% hosi orsamentu rihun $340.544,36.

Fundu Espesial aprova hosi Estadu hodi kombate surtu COVID-19 ho forma rezumida to’o oras ne’e ho montante $92,062,157.00.

Notísia Relevante: CIGC Apresia Inisiativa Xanana Gusmão Iha Ámbitu Hasoru COVID-19

Montante orsamentu rihun $340.544,36 ne’e mak preveE ba CIGC hodi halo serbisu administrasaun no lojistika durante implementasaun Estadu Emerjensia (EE).

“Relatóriu ne’ebé mak ami hetan rezultadu ezekutadu hosi orsamentu ne’e hamutuk 61.4%. Orsamentu ne’ebé utiliza iha sala situasaun CIGC hamutuk rihun $340.544,36 ba iha parte administrasaun no lojístika ba sala situasaun,” dehan Eis Koordenadór CIGC ne’ebé hetan konvite hosi Primeiru-Ministru, Taur Matan, hodi halo aprezentasaun kona-ba relatóriu ba aplikasaun Estadu Emerjénsa, iha Uma Fukun Parlamentu Nasionál, tersa ne’e.

Maibé, nia dehan, iha mós uzu balun ba iha atividade operasionál entidade tolu hanesan F-FDTL, PNTL no Bombeiru ne’ebé mak presiza kustu adisionál ba iha sira-nia atividade operasionál ne’ebé mak ho totalidade millaun $5.395.605.00

Nia hateten, rekursu sira seluk maka presiza haree no importante tebes iha prosesu kombate COVID-19 ne’e mak infraestrutura, ekipamentu no medikamentu.

“Ita mós halo procurement balun ba iha rai-li’ur maibé infelismente ita la hetan resposta adekuada maibé ita-nia partidu polítiku sira mós halo esforsu iha ámbitu kombate COVID-19. Ita sei iha difikuldade boot ba segunda vaga,” nia dehan. 

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here