Asosiasaun Antigus Deputadus Timor-Leste (AADTL) hala’o audiénsia ho Prezidente Repúblika (PR), Francisco Guterres ‘Lú Olo. Imajen/Mídia PR.

DILI, 27 jullu 2020 (TATOLI)—Membru Assembleia Konstituante, ne’ebé uluk hakerek konstituisaun Repúblika Demokratika Timor Leste (K-RDTL) ne’ebé oras ne’e halibur aan iha Asosiasaun Antigus Deputadus Timor-Leste (AADTL) hala’o audiénsia ho Prezidente Repúblika (PR), Francisco Guterres ‘Lú Olo’ hodi hato’o asuntu importante rua kona-ba Assembelia Konstituante no meza Prezidente Parlamentu Nasionál deputadu balu halo rahun.

Prezidente AADTL, Nominando Buras Martins, hateten AADTL ko’alia no kestiona makaas konaba kona-ba meza Prezidente Parlamentu Nasionál nian ne’ebé harahun hosi deputadu CNRT nian tanba iha meza ida-ne’e nia leten mak membru Assembleia Konstituante sira ida-idak asina Konstituisaun Repúblika Demokratika Timor-Leste (KRDTL).

“Iha sorumutu ne’e, ami ami ko’alia kona-ba meza Parlamentu Nasionál nian ne’ebé mak rahun no iha meza ida-ne’e nia leten maka membru Assembleia sira ida-idak ba assina konstituisaun ne’e iha nia leten. Maibé, iha kinta lejislatura ne’e tanba diverjénsia polítika, diverjénsia hanoin, maka meza ne’e rahun tiha. Ami fó hanoin mós ba Prezidente Repúblika katak, ita labele haree meza ne’e hanesan materiál maibé haree ho matan valor istóriku sira ne’ebé mak iha,” dehan  Prezidente AADTL, Nominando Buras Martins, ba jornalista sira hafoin hala’o audiénsia ho Prezidente Repúblika, iha Palásiu Prezidente Nicolau Lobato, Bairrupité, Dili, segunda ne’e.  

Aosiasaiun ne’e, nia hatutan, konsidera situasuan ne’e lori triste boot ba povu Timor-Leste tomak no konsidera situasaun ne’e akontese tanba faillansu hosi partidu politiku sira mak la eskolla didi’ak reprezentante povu iha uma fukun Parlamentu Nasionál (PN).

Entretantu, iha audeiénsia ne’e, AADTL mós ko’alia kona-ba kestau Assembleia Konstituante ne’ebé uluk iha membru hamutuk ema na’in-88 no entre membru hirak ne’e iha membru kuaze ema na’in-10 fila hikas on aba Maromak nia uma.

“Ami ko’alia mós kona-ba kestaun ne’ebé mak liga ho Assembleia Konstituiante ne’ebé iha membru deputadu na’in 88 no nia membru 10 resin mate tiha ona, hela de’it sira seluk,”  Nominando Buras Martins hatetetn.

Nia hateten, razaun asosiasaun ne’e halo audiénsia ho Prezidente Repúblika atu hosi nune’e bele haree took membru sira ne’ebé oras ne’e balun sei moris, balun mate tiha ona, Prezidente Republika ne’ebé uluk mós hanesan Prezidente ba Asembleia Konstituinte pelumenus tau matan ka fó netik konsiderasaun ruma ba membru sira ne’ebé mak sei moris.

Entretantu, Assembleia konstituinte RDTL, ne’ebé eleita iha 30 agostu 2001, aprova atuál  K-RDTL iha loron 22 fulan marsu tinan 2002,  ne’ebé asina husi deputadu eleitu na’in 88 ho nia Prezidente  maka Francisco Guterres Lu Olo, vise Francisco Xavier do Amaral no Arlindo Marçal, ho deputadu sira husi ASDT hamutuk na’in 6, FRETILIN na’in 55, Independente na’in 1, KOTA na’in 2, PD na’in 7, PDC na’in 2, PL na’in 1, PNT na’in 2, PPT na’in 2, PSD na’in 6, PST na’in 1, UDC/PDC na’in 1 no UDT na’in 2.

Jornalista : Cipriano Colo

Editór       :  Cancio Xiemens

HAKEREK NO HATÁN

Please enter your comment!
Please enter your name here