Memensio Sequeira Freitas.

(Nani Tuir Liberdade Imprensa Ala Tatoli,I.P Durante Tinan Haat Eziste iha Timor-Leste)

Hosi: Memensio Sequeira Freitas*)

Iha tinan haat liu ba kotuk, ezatamente iha loron 27 fulan jullu 2016, liuhosi Rezolusaun Governu númeru 9/2016 de 16 de março, aprova kriasaun embriaun ida ba ajénsia notisioza para bele hahú dezempeña funsaun sira hosi ajénsia notisioza ofisiál hosi Estadu to’o bele kria kondisaun ba estabelesimentu institutu públiku ida. Ho rezolusaun Governu ne’e Tatoli mosu hanesan embriaun ida iha Sekretária Estadu Komunikasaun Sosiál (SECOMS, sigla portugés) nia mahon durante tinan rua nia laran.

Laiha buat ida mak sala hosi kriasaun ida-ne’e. Tanba, Estadu presiza iha ninia ajénsia notisioza ida ke tutela direta ba Sekretária Estadu Komunikasaun Sosiál (SECOMS), nune’e bele fasilita mós Governu iha divulgasaun informasaun relasiona ho governasaun. Kriasaun ajénsia notisioza sira hanesan ne’e la’ós buat foun iha ita-nia rain. Nasaun barak iha mundu mós kria ajénsia notisioza Estadu nian nu’udar instituisaun públika ida. Iha Indonézia, ezemplu, sira iha mídia ofisiál Governu nian hanesan RRI, TVRI no Perum LKBM ANTARA. Entre mídia tolu ne’e, kanál notísia (news room) hamutuk iha situasaun balun. Hanesan ne’e mós, iha Portugál eziste Lusa ne’ebé sai mós hanesan mídia ofisiál Estadu nian. Ezisténsia hosi mídia Estadu hirak ne’e mak atu divulga informasaun sira kona-ba governasaun maibé mós atu fornese informasaun no notísia ba públika. Iha nasaun seluk, mídia Estadu nian utilizadu nu’udar meiu ba propaganda hosi governante sira kona-ba sira-nia ukun.

Objetivu loloos hosi kriasaun Tatoli,I.P ne’e mak atu kria fonte informasaun ofisiál ho produsaun notísia ba públiku iha eskala nasionál, rejionál no internasionál. Aleinde ne’e, ezisténsia Tatoli,I.P nian atu sai nu’udar karaterizadór ba kanál informativu ida Governu nian, iha ne’ebé bele fornese informasaun kredível sira no loloos ba povu tuir prinsípiu komunikasaun sosiál nian no evita atu divulga informasaun falsa (hoax) sira iha mídia sosiál nia laran. Nune’e, prezensa hosi ajénsia notisioza Tatoli,I.P importante tebe-tebes iha prosesu dezenvolvimentu ita-nia rain nian, liuliu atu kontribui iha aspetu informasaun no komunikasaun.

Tatoli,I.P iha ninia Liberdade Imprensa no Liberdade Espresaun?

Iha TATOLI,I.P nia estatutu, artigu 1 númeru 2 ko’alia momoos katak Tatoli nu’udar pesoa koletiva ida hosi direitu públiku, ho ninia natureza nu’udar institutu públiku, dotada hosi personalidade jurídika no autonomia administrativa, finanseira no patrimóniu própriu. Ida-ne’e hatudu, mezmu Tatoli tutela ba iha Sekretária Estadu Komunikasaun sosiál (SECOMS) maibé nu’udar Institutu Públiku, Tatoli iha autonomia ba ninia administrasaun, finanseira no patrimóniu rasik ne’ebé mai duni hosi Orsamentu Jerál Estadu (OJE) nian. Ne’eduni, ita bele haree katak Governu hakarak duni dezenvolve área komunikasaun sosiál hanesan pilár importante ba dezenvolvimentu nasionál.

Biar nu’udar mídia Estadu maibé Tatoli ninia divulgasaun ba notísia no informasaun sira nafatin bazea ba iha liberdade imprensa tuir Lei Komunikasaun Sosiál hatuur iha ninia artigu 8 ne’ebé dehan: O direito dos jornalistas de informar exerce-se com base nas prerrogativas constitucionais, não podendo ser objeto de ingerências que atentem contra a sua independência e objetividade, a liberdade de criação, a liberdade de consciência, o seu direito de procurar e obter informação, o sigilo profissional e o direito de participar na orientação editorial do meio de comunicação social para o qual trabalha, nem de constrangimentos ao cumprimento dos deveres deontológicos da sua profissão.

Katak, jornalista sira ne’ebé servisu iha Tatoli,I.P iha mós ninia direitu atu divulga informasaun no notísia ruma, ezerse bazea ba prerogativa konstitusionál sira (hak istimewa konstitusional), hodi la sai influensiadór ne’ebé kontra ninia independénsia no objetividade, liberdade ba kriasaun, liberdade ba konsiénsia, ninia direitu ba iha buka no hetan informasaun, segredu profesionál no direitu ba partisipa iha orientasaun editoriál iha meiu komunikasaun sosiál ne’ebé nia serbisu ba, nein iha ameasa ruma ba kumpre ninia dever deontolójiku (ciência do dever e da obrigação)  sira hosi ninia profisaun. Ne’eduni, iha ne’e, ita haree katak iha duni liberdade imprensa hosi Tatoli,I.P embora nia abriga aan iha Governu nia okos. Katak, Governu la limita liberdade imprensa ida-ne’e ba Tatoli,I.P.

Anelise Zenoni (2019) fó deskrisaun badak kona-ba liberdade imprensa katak  “Liberdade de imprensa é um assunto que existe há décadas, porque o trabalho do jornalista incomoda, porque ele é capaz de mostrar o que está nos bastidores, o que nem a gente acredita que existe. Então, por que há pessoas que consideram que o jornalista não deve fazer seu trabalho? Porque o jornalismo denuncia, mostra as mazelas de onde vivemos e escancara as atitudes ilícitas de muitos políticos, empresários e pessoas de poder (e até aquelas sem poder também). Ter acesso à informação é um direito de todos e por isso precisamos dos jornalistas”.

Katak, liberdade imprensa ne’e sujeitu ida ke eziste kleur ona ka iha kedas dékada hirak liu ba tanba dala barak jornalista sira-nia serbisu hasoru inkomodasaun, tanba nia konsege monstra sai buat ne’ebé helik aan hela iha bastidór nia kotuk (balik layar) até buat ne’ebé ita la fiar katak eziste duni. Entaun liberdade imprensa mosu atu fó liberdade ba jornalista sira hodi bele halo kobertura ba asuntu hotu-hotu ne’ebé akontese iha país ka fatin ruma. Asesu ba informasaun nu’udar direitu ema hotu-hotu nian, tanba ne’e ita presiza duni jornalista sira atu bele fornese kualkér informasaun ne’ebé ema hakarak asesu. No, tanba razaun ida-ne’e duni mak labele iha ema ruma ka instituisaun ruma, nem Estadu ruma atu limita fali liberdade imprensa hosi jornalista no mídia sira.

Ha’u rasik la hatene loloos buat ne’ebé akontese internamente iha Tatoli,I.P, kona-ba sira-nia mekanizmu serbisu ka relasaun resíproku entre Tatoli,I.P no Governu. Maibé, hosi fornesimentu informasaun no notísia sira durante ne’e, ha’u bele nota katak Tatoli,I.P serbisu duni bazea ba liberdade imprensa nu’udar hatuur iha Lei Komunikasaun Sosiál nian. Ha’u observa katak notísia hotu-hotu ne’ebé Tatoli,I.P divulga kada loron ne’e kobre área hotu-hotu, ba entidade hotu-hotu, hosi instituisaun públika ka privada, divulga mós informasaun kona-ba serbisu sira governasaun nian no informasaun sira hotu ne’ebé relasiona ho prosesu dezenvolvimentu ita-nia rain (Timor-Leste) nian. Katak, laiha limitasaun ba iha divulgasaun informasaun ne’ebé Tatoli halo.

Tatoli,I.P mós durante ne’e divulga informasaun barak ne’ebé kobre aspetu hotu hanesan edukasaun, polítika, sosiál, ekonomia, negósiu, arte no kultura no dezastre ruma ne’ebé ita-nia populasaun sira hasoru. No, sira-nia kobertura la’ós de’it iha kapitál laran maibé dala barak sira divulga mós informasaun sira hosi munisípiu to’o suku no aldeia. Ha’u bele dehan, talvés ida-ne’e tanba fasilidade ne’ebé sira hetan hosi Estadu maibé,pelu menus Tatoli,I.P durante ne’e sai tebes duni ajénsia notisioza ida ke kada loron hatuun ka publika notísia no informasaun barak ba públiku atu bele asesu. Tatoli,I.P mós fó biban ba públiku atu bele hato’o ninia opiniaun sira liuhosi artigu sira.

Aleinde liberdade imprensa, Tatoli,I.P mós tuir ha’u-nia observasaun promove mós liberdade espresaun iha divulgasaun informasaun sira. Ida-ne’e, hatudu liuhosi espasu ne’ebé Tatoli,I.P oferese ba públiku atu hato’o sira-nia artigu ruma iha koluna Opiniuan nian. Buat ne’ebé ha’u rasik esperimenta iha ha’u-nia artigu sira mak Tatoli,I.P iha duni ekipa redasaun ka editór hodi haree tuir artigu sira maibé la halo korta ka muda konteúdu hosi ema-nia artigu. Tatoli,I.P mós la limita atu ema hakerek artigu kontra malu (pro no kontra), bastante artigu sira be hakerek kontra malu ne’e hotu-hotu publika iha Tatoli,I.P tuir regra jerál mundu jornalizmu nian. Ne’eduni, ba ha’u, Tatoli,I.P biar nu’udar mídia Estadu maibé la limita liberdade espresaun hosi públiku ne’ebé hakarak hato’o mós nia opiniaun ruma liuhosi mídia ida-ne’e.

Liberdade espresaun mós hatuur iha artigu 9 hosi Lei Komunikasaun Sosiál, nune’e, mídia hotu-hotu inklui Tatoli,I.P iha obrigasaun atu kumpre lei refere. Juliana Bezerra (2019) liuhosi nia artigu entituladu “Liberdade de Expressão” ne’ebé publika iha jornál Sociologia dekreve katak “Liberdade de Expressão é o direito que permite as pessoas manifestarem suas opiniões sem medo de represálias. Igualmente, autoriza que as informações sejam recebidas por diversos meios, de forma independente e sem censura.

Ou seja, ela significa o direito de exteriorizar a opinião pessoal ou de um grupo, sempre com respeito e respaldada pela veracidade de informações. Esse direito é garantido pela Declaração Universal dos Direitos Humanos”.

Dehan katak, liberdade espresaun ne’e direitu ida ke permite ema hotu-hotu bele espresa ka manifesta sira-nia opiniaun sira la ho ta’uk no represálias (pembalasan). Hanesan ne’e mós la hafo’er informasaun ne’ebé ema sei asesu ho meiu oin-oin independentemente no lahó sensura (sensor). Ita bele dehan mós katak liberdade espresaun hanesan direitu ida atu esterioriza ka konkretiza opiniaun pesoál ka hosi grupu ida, sempre ho respeitu no respalda (legalizasaun) hosi verasidade (kebenaran) ba informasaun sira ne’e rasik. Direitu ida-ne’e garantidu iha Deklarasaun Universál Direitu Umanu nian.

Aleinde garantidu hosi Lei Komunikasaun Sosiál, liberdade imprensa no espresaun hosi Tatoli,I.P vinkuladu mós hosi artigu 40 no 41 hosi ita-nia Lei Inan. Tanba liberdade imprensa no espresaun ne’ebé Tatoli,I.P iha ne’e vinkuladu hosi Lei Komunikasaun Sosiál no KRDTL mak ho konviksaun tomak ha’u bele garante katak eziste duni Liberdade Imprensa no Liberdade Espresaun iha Tatoli,I.P, embora nia hanesan mídia ofisiál Governu nian.

Atu hakotu ha’u nia artigu simples ida-ne’e. iha ámbitu komemora aniversáriu Tatoli,I.P ba dahaat nian, ha’u hakarak hato’o ha’u-nia agradesimentu ua’in ba ekipa tomak Tatoli,I.P nian, hosi Konsellu Diretivu to’o jornalista sira no funsionáriu tomak tanba bele fó biban hodi ami, hanesan penulis lepas bele espresa ami-nia opiniaun liuhosi mídia ida-ne’e. Parabéns ba Tatoli,I.P no ba ekipa tomak. Susesu nafatin iha Ita-Boot sira-nia kareira no serbisu loro-loron nian. Hein katak Tatoli,I.P sai tebes duni referénsia di’ak ba mídia sira hotu iha Timor-Leste hanesan fó sai ona hosi Konsellu Imprensa loron ruma liu ba.

Espetativa povu no públiku tomak ba Ita-Boot sira mak Tatoli,I.P tenke sai tebes ajénsia notisioza ida ke fornese informasaun oin-oin ba públiku loro-loron ho kualidade informasaun no notísia ne’ebé gaña ema nia fuan hodi hadomi Tatoli hanesan sira-nian rasik. Basá, Tatoli iha tanba povu ida-ne’e nia nesesidade ba informasaun. TATOLI tama to’o lidun sira hodi haklaken lia-loos ba sosiedade tomak iha rai-doben Timor-Leste no ba mundu tomak. TATOLI, Ad Multus Annos (semoga panjang umur) no kontinua forsa hodi hakat ba oin.

*) Hakerek na’in nu’udar profesór Biolojia ida iha Eskola Sekundária Públia Olocassa Ossú (Viqueque).

2 KOMENTÁRIU

  1. Congratulation Tatoli team for add another year, we all hope that the best for all the staff and may all the work benefit the community.

  2. kongratula Agensia tatoli IP, Atu fornese info diak ba comunidade, ba nasaun no mundo, tamba moris ne’e presija duni buat diak/moris diak, hodi ita diak hela deit iha mundo ida ne’e, Obrigado wain.

HAKEREK NO HATÁN

Please enter your comment!
Please enter your name here