Sekretariu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

DILI, 27 jullu 2020 (TATOLI) – Iha ámbitu seremónia aniversáriu Agência Tatoli ba dahaat, Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’ husu ba funsionáriu mídia Estadu ne’e atu kontinua dezenvolve-an, nune’e bele fó informasaun ne’ebé kredível maski hamosu preokupasun balun iha públiku.

“Ha’u hakarak reforsa tan ita bo’ot sira na’in-42 ne’ebé iha, atubele dezenvolve-an hodi matenek liután haree Tatoli hanesan instituisaun ne’ebé to’o nível Primeiru-Ministru dehan atu to’o hanesan ajénsia noisioza tenke liu prosesu naruk,” tenik Sekretáriu Estadu Akara iha diskursu ba seremónia aniversáriu Agência Tatoli, iha segunda ne’e, iha salaun INFORDEPE, Balide.

Tuir governante ne’e, atu sai hanesan ajénsia notisiosa rai-li’ur presiza tuir dalan loos maibé Tatoli presiza tuir ninia dalan rasik.

“Bainhira ita liu dalan loos iha posibilidade ita nunka to’o no bainhira ita duni ema seluk no nia mós halai daudaun ita nunka toman malu  di’ak, tanba ne’e ha’u husu matenek na’in-42 Agência Tatoli halo estratejia halai tuir Timór nia matenek hanesan uluk ita manan funu,” Akara akresenta.

Biban ne’e, Sekretariu Estadu ne’e louva rekursu umanu ne’ebé Agência Tatoli iha tanba ho rekursu ne’ebé iha maka mídia online ne’e kontinua eziste to’o agora.

“Ha’u ohin hato’o ha’u-nia sentimentu kontente tanba Tatoli la’o tinan-haat ona no prosesu hotu ita bo’ot sira hatudu pasu pozitivu no la’o di’ak. Ida-ne’e hotu akontese tanba rekursu umanu ne’ebé maka iha hanesan Prezidente Tatoli, José da Costa, Vise-Prezidente, Manuel Pinto no Vise-Prezidente inklui funsionáriu sira,” nia subliña.

Sekretáriu Estadu ne’e konsidera ho rekursu ne’ebé iha maka bele konkretiza mídia Estadu ne’e nia mehi.

“Pesoálmente kontente ho ita bo’ot sira nia obra tanba ita bo’ot sira matenek no iha kapasidade,” nia akrsenta.

Akara apresia ho Tatoli ninia vizaun ne’ebé hateke ba dook.

“Ha’u kontente ba ita bo’ot sira-nia vizaun ne’e hodi hateke ba dook, ita preokupa ita-nia situasaun daudaun ne’e maibé iha Timór ita bo’ot sira uza tempu hatene ona hodi la’o ba dook, nune’e iha tinan tuirmai ita bo’ot bele sai di’ak liután,” nia realsa.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here