BOBONARU, 27 jullu 2020 (TATOLI)- Komandu Polísia Munisípiu Bobonaro hato’o parabéns ba Agência Notisioza Timor-Leste, TATOLI,I.P ne’ebé, ohin, selebra ninia aniversáriu ba dahaat (27 jullu 2016 -27 jullu 2020).
Notísia Relevante : Tinan Haat Eziste, TATOLI Kontribui Ona ba Pensamentu Krítiku
Komandante Polísia Munisípiu Bobonaro, Superintendente Xefe Octávio de Araújo Bucar, rekomenda ba Tatoli atu destaka ona jornalista korrespondente Tatoli nian iha fronteira Bobonaro hodi halo kobertura ba atividade Estadu no povu nian ne’ebé sai hanesan munisípiu ida ne’ebé baliza nasaun viziñu Indonézia
“Parabéns ba susesu, se agência Tatoli atu la’o di’ak liután ba ho firme, ha’u sujere presiza aumenta rekursu hodi destaka korrespondente Tatoli nian ida iha fronteira Bobonaro hodi fó sai informasaun loroloron ba atividade tomak Estadu nian liga ho seguransa no atividade komunidade iha Bobonaro,” hateten Superintendente Xefe, Octávio ba Tatoli iha Komandu Munisípiu Bobonaro, ohin.
Komandante Octávio hatutan, ba oin PNTL Bobonaro sei implementa programa servisu tránzitu no servisu polisiamentu komunitáriu nian atu hakbesik ba povu oinsá haklaken dame, tanba ne’e presiza prezensa mídia hodi ajuda partilla informasaun ba sosiedade.
“Ami presiza tebes Agência Tatoli ninia prezensa hodi envolve-an direita iha atividade sira para ajuda ami polísia nia servisu oinsá ita hametin paz iha ita nia sosiedade,” nia hateten.
Iha parte seluk, Komandu PNTL Bobonaro hato’o agradese ba Aman Maromak atu haraik nafatin bensaun ba ekipa Tatoli tomak hodi hala’o misaun ho profisionál.
“Ikus liu ha’u hato’o parabéns Tatoli, Nai Maromak no Rai Lulik fó nafatin kbiit no beran ho buras hodi servisu ho di’ak liután atu fó konfiansa ba povu no Estadu,” nia hateten.
Nu’udar lee na’in no fontes informasaun ba Tatoli, Komandante Bucar apresia notísia Tatoli nian tomak hakerek tuir padraun tetun INL nian ho estruturadu.
“Hanesan lee na’in ida ha’u agradese tebes, durante ne’e akompaña notísia online Tatoli nian hakerek di’ak tebes no ha’u mós sai fontes hodi halo entrevista ho Tatoli fó sai informasaun no atividade seguransa nian hodi fahe informasaun públiku,” nia agradese.
Jornalista : Eugénio Pereira
Editór : Francisco Simões
