Enkontru Primeiri-Ministru, Taur Matan Ruak ho liña ministeriál kona-ba setór infraestrutura, Paládiu Governu, segunda (27/07). Imajen/GPM

DILI, 27 jullu 2020 (TATOLI) – Primeiru-Ministru (PM), Taur Matan Ruak, hala’o enkontru kortezia ho liña ministeriál hodi dikute kona-ba planu prioridade iha setór infraestutura atubele aloka iha Orsamentu Jerál Estadu (OJE) 2020 no 2021.

Xefe Governu halo enkontru ho Vise Primeiru-Ministru no Ministru ba Planu & Ordenamentu, José Maria dos Reis, Ministru Prezidénsia Konsellu Ministru, Fidelis Manuel Leite Magalhães, Ministru Obra Públika, Salvador Soares dos Reis Pires, Ministru Transporte no Komunikasun, José Agustinho Da Silva no Reprezentante Unidade Planeamentu Monitorizasaun no Avaliasaun (UPMA).

“Ami enkontru ho Primeiru-Ministru atubele koordena malu no diskute prioridade área infraestutura ida ne’ebé importante liu atubele aloka iha Orsamentu Jerál Estadu 2021,” tenik Vise Primeiru-Ministru no  Ministru ba Planu no Ordenamentu, José Maria dos Reis, hafoin enkontru ho PM Taur iha Palásiu Governu, segunda ne’e.

Vise PM haktuir, enkontru ohin Xefe Estadu fó instrusaun ba ministériu tolu ne’e atu tuur hamutuk filafali hodi diksute kle’an planu prioridade no difine kalendáriu prioridade iha setór infraestutura atu tau iha jornada orsamentál.

Pontu konkretu iha setór infraestutura, governante ne’e informa hanesan estrada, ponte, bee-moos, edukasaun no saúde

“Ha’u hanoin semana ida ne’e ami sei filafali mai atu lori ajenda prioridade iha setór infraestutura ida klaru ba Xefe Governu,” nia akresenta.

Governu liuhosi reuniaun Konsellu Ministru (KM) estraordinária foin lalais ne’e aprova tetu Proposta OJE ba tinan fiskál 2020 họ valór hamutuk biliaun $1,492,3.

Prioridade ne’ebé define ona iha tinan ne’e maka estabilizasaun ba setór sosiál ne’ebé foka ba saúde, edukasaun, formasaun, bee no saneamentu, estabilizasaun ba setór ekonómiku ho foka ba promosaun investimentu ba setór privadu, kriasaun ba empregu, agrikultura, no seguransa alimentár no polítika makro-ekonómiku, reforma ba administrasaun públika, ekonomia, sistema judisiáriu no jestaun ba finansa públika.

Bazeia ba prioridade hirak ne’e, porsentu 33,8 hosi valór totál OJE sei aplika ba setór sosiál, porsentu 8 ba edukasaun, porsentu 15 ba protesaun sosiál, porsentu 11 ba saúde no porsentu 48,5 ba dezenvolvimentu ekonómiku no infraestrutura inklui medida ba estabilizasaun ekonómika iha ámbitu COVID-19 nian.

Governu sira aprova mós kalendáriu atu halo preparasaun ba OJE 2020, ne’ebé sei deskute no aprova iha KM iha loron 26 agostu no sei submete ba Parlamentu Nasionál (PN) iha loron 15 setembru.

Kalendáriu ba OJE 2021 nian, prevee katak KM bele apresia proposta iha loron 25 setembru no sei submete ba PN iha loron 15 outubru.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here