Ministru Asuntu Parlamentár no Komunikasaun Sosiál, Francisco Jerónimo. Imajen Tatoli/Egas Cristovão

DILI, 27 jullu 2020 (TATOLI) – Ministru Asuntu Parlamentár no Komunikasaun Sosiál (MAPKOMS), Francisco Jerónimo, partisipa iha seremónia Aniversáriu Agência Tatoli ba dahaat no iha ninia diskursu governante ne’e enkoraja mídia Estadu ne’e atu dezempeña serbisu ho di’ak liu tán no garante Governu nafatin apoia.

“Prezensa Governu nian ne’e,  atu fó  mensajen ba hotu-hotu katak ami prontu atu hamutuk ho Tatoli atu lori ba oin,  tuir saida mak hotu-hotu mehi,” dehan Ministru Francisco iha seremónia ne’ebé realiza iha segunda ne’e, iha salaun INFORDEPE, Balide.

Governante ne’e haktuir, Primeiru-Ministru, Taur Matan Ruak, felisita Agência Tatoli ho ninia estrutura tomak ba selebrasaun aniversáriu ne’e.

“Primeiru-Ministru hato’o parabéns ba Tatoli ne’ebé halo tinan ba dala haat,” nia dehan.

Iha mensajen ba aniversáriu mídia online ne’e, Ministru ne’e enkoraja Agência Tatoli marka diferensa no sai referénsia entre entidade sira seluk ne’ebé hala’o serbisu iha meiu komunikasaun sosiál.

“Ha’u nafatin fó korajen ba Tatoli atu la’o nafatin ba oin no marka nafatin diferensa liuliu iha infomasaun no notísia tenke iha oin ho kredível, loos, akuradu no rapidéz atu sai referénsia ba mídia sira seluk hodi defende interese Estadu Timor-Leste,” subliña governante ne’e.

Nia iha esperansa, ho tinan haat ezisténsia bele haree filafali saida mak seidauk di’ak hodi hadi’a nafatin neneik maibé bebeik to’o objetivu.

“Ha’u hakarak iha tinan-haat ne’e no ba tinan oin mai bele sai di’ak liután atu rápidu iha divulgasaun notísia ne’ebé iha kualidade no garantidu katak notísia ne’e loos,” nia afirma.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here