Traballadór Januário Ivan Dias Marçal. Imajen/Ivan

DILI, 26 jullu 2020 (TATOLI) – Traballadór timor-oan na’in-lima ne’ebé Kompañia Wartsila hapara kontratu sente triste tanba laiha razaun ida forte.

Kompañia internasionál ne’e sei hapara kontratu traballadór sira iha 31 jullu 2020 no sei la kontinua kontratu, maibé sei kumpre obrigasaun remuneratóriu ne’ebé fixa tiha ona iha kontratu ho traballadór sira.

Traballadór Januário Ivan Dias Marçal, konsidera durante ne’e dezempeña serbisu ho di’ak no la viola regra kontratuál ruma.

“Dahuluk, ami sente triste tanba kompañia (Wartsila) nia razaun hasai ami la forte, sira hatún ami-nia valór dezempeñu atu sai razaun ba sira hapara ami-nia kontratu, maibé durante ne’e ami-nia valór di’ak hotu, ne’ebé kada tinan ami-nia saláriu sa’e,” tenik Traballadór Januário ba Agência Tatoli, via rede sosiál, dominggu ne’e.

Notísia Relevante: Ministru Salvador Bolu Ona Wartsila Esplika Razaun Hapara Traballadór Na’in-Lima

Traballadór nain-lima ne’ebé durante ne’e serbisu ho kompañia Wartsila hanesan tékniku iha Sentrál Elétrika Hera maka hanesan, João Baptista Verdiál, Nelio Assunção de Jesus, Junito Estêvão Araújo Reis, Januário Ivan Dias Marçal no Elo-King Benay da Costa Marques.

Januário Ivan rejeita deklarasaun kompañia ba Ministériu Obra Públika (MOP) ne’ebé dehan katak viola pontu lima hodi kompañia hapara kontratu.

“A’at liután Wartsila nia karta ba MOP ne’ebé dehan ami kontra pontu lima, ne’ebé publika liuhosi pájina facebook MOP, ne’e la loos,” nia realsa.

Traballadór ne’e dehan, tuir loloos Kompañia Wartsila halo investigasaun kle’an tanba deskonfia katak mosu falsifikasaun iha lista prezensa maibé uza razaun la razoavél dehan kestaun distansiamentu sosiál.

“Pelumenus sira halo investigasaun atubele hatete dehan se loos mak halo maibé sira la halo no dun mai ami na’in-lima, a’at liután investigasaun ne’e sira simu hosi Eletricidade de Timor-Leste (EDTL) sein buka tuir faktu, maibé kompañia tolan tomak saida mak EDTL fó ba sira,” Ivan lamenta.

Kona-ba konferénsia impresa ne’ebé sira realiza foin lalais, traballadór ne’e esplika molok semana ida dirijente kompañia sira hatene ona no sira dehan traballadór sira halo asaun ne’e laiha problema.

“Ami husu ba sira atu bolu dirijente EDTL mai atu halo audiénsia, maibé sira lakohi, hodi nune’e mak ami halo asaun hosi mídia no sira hateten laiha buat ida. Ami halo asaun iha Óleu Pezadu ne’e otomátikamente ami tenke uza farda ne’e. Ha’u rasik iha momentu ne’ebá la uza farda Wartsila nia,” nia akresenta.

Nia rejeita mós katak, traballadór sira-nia atitude ladi’ak tanba durante serbisu hamutuk ho Wartsila iha Setrál Eletrika Hera ne’e foin dahuluk kompañia halo notifikasaun la estende ho razaun ida la forte.

“Ha’u serbisu iha Óleu Pezadu Hera durante tinan-haat fulan-lima, ne’ebé tinan-tolu ho Wartsila no tinan-ida fulan-lima ho Puri Akraya,” nia haktuir.

Nia konta tuir tan, hetan ona informasaun hosi Plant Maneger, Purwanto no Contract Manager, Ridwan, liuhosi WhatsApp ne’ebé agora daudaun espalla iha rede sosiál katak Ministru Obra públika, Salvador Eugênio Soares dos Reis Pires mak orienta kompañia hasai traballadór sira.

Traballadór na’in-lima ne’e halo ona asaun hodi keixa Kompañia Warstila no MOP ba Parlamentu Nasionál, Provedoria Direitu Umanu no Justisa (PDHJ, sigla portugés).

Antes ne’e, Ministru Salvadór klarifika katak traballadór na’in-lima ne’e la’ós resposabilidade MOP nian maibé Kompañia Wartsila mak hapara sira-nia kontratu.

Wartsila rasik bainhira halo avaliasaun dezempeñu no avaliasaun tékniku ba traballadór sira ne’e, bainhira haree ba esperiénsia no abilidade hatudu katak di’ak, natón, sufisiente maibé iha komportamentu maka menus (tuun) tiha hafoin sira-nia asaun halo konferénsia imprensa uza farda kompañia.

Ho nune’e, governante ne’e dehan traballadór  na’in-lima ne’e Kompañia Wartsila nian ne’ebé laiha MOP nia kompeténsia.

Entretantu, Kompañia Indonéziu ne’e konsidera traballadór na’in-lima ne’e komete violasaun grave hasoru Kódigu Konduta Profisionalizmu no kontra protokolu kompañia nian hanesan falsifika lista prezensa no asinatura ba halo konferénsia imprensa, maibé laiha koñesimentu jerente Sentrál Elétriku Hera no EDTL, nune’e mós kontra protokolu Estadu Emerjénsia nian no pandèmia COVID-19.

Nune’e mós, uza uniforme Wartsila nian halo konferénsia imprensa hodi husu kompensasaun ba MOP, ne’ebé ho sira-nia asaun afeita ba imajen no reputasaun kompañia nian.

Wartisila hanesan kompañia internasionál ne’ebé durante ne’e halo operasaun no manutensaun ba Sentrál Elétrika Hera.

Ba kestaun ne’e, Agência Tatoli seidauk hetan informasaun hosi Kompañia Wartsila kona-ba razaun hapara traballadór no WhatsApp hosi dirijente kompañia ne’ebé espalla iha Facebook.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here