Tratór. Imajen/Espesiál

DILI, 26 jullu 2020 (TATOLI) – Ministru Agrikultura no Peska, Pedro Reis hateten iha futuru sei la oferese tan tratór ba agrikultór sira tanba tratór ne’ebé Ministériu Agrikultura no Peska (MAP) fahe antes ne’e to’o agora seidauk uza hotu.

“Apoiu tratór ba agrikultór iha futuru susar oituan tanba tratór ne’ebé fahe antes ne’e ba agrikultór sira to’o agora ami ba haree katak utilizasaun seidauk kona sasaran ne’ebé ba futuru atu apoiu tan ne’e susar, maibé ami buka hadi’a de’it ne’ebé iha ona,” dehan Ministru Pedro, foin lalais ne’e iha salaun MAP, Comoro.

Governante ne’e hatutan, ba tratór sira ne’ebé antes ne’e MAP fahe ba agrikultór sira, daudaun ne’e parte tékniku sira tun diretamente ba munisípiu sira hodi haree halo didi’ak, nune’e ba futuru sei hadi’a de’it.

“Sasán sira ne’e ita la’o foti fó de’it maibé tenke liuhosi prosesu naruk, sei liuhosi Konsellu Ministru no orsamentu ba tan Parlamentu Nasionál, ne’ebé ami atu ko’alia kona-ba apoiu tratór ne’e susar oituan maibé ami sei buka meiu tuir kapasidade ministériu,” nia subliña.

Iha tinan 2007 no 2008, MAP implementa programa sosa tratór hodi halo extensifikasaun, intensifikasaun no reabilitasaun ba fasilidade agrikultura hodi atende kestaun seguransa ai-han.

Governu sosa tratór hamutuk 300 no tratór liman 2.250 hodi fahe ba agrikultór sira hodi hasa’e produsaun agríkola.

Kada tinan, MAP sempre prevee orsamentu atu halo manutensaun ba tratór sira.

Antes ne’e, Primeiru-Ministru, Taur Matan Ruak, orienta MAP atu hala’o leilaun ba tratór sira no konsege halo leilaun ba tratór hamutuk 56 no ema foin sosa rua.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here