Estensionista hosi MAP no Agrikultór sira koko mákina ko’a hare iha Hatas, Bobonaro. Imajen/Austrália iha Timor-Leste

DILI, 26 jullu 2020 (TATOLI) – Embaixadór Austrália ba Timor-Leste, Peter Roberts, hateten Governu Austrália apresia kooperasaun ho Governu Timor-Leste nu’udar nasaun viziñu, tanba ne’e aleinde kooperasaun iha área oinoin ne’ebé halo ona, kada tinan Austrália apoiu Ministériu Agrikultura no Peska (MAP) liuhosi programa ‘To’os ba Moris Di’ak (TOMAK).

TOMAK hanesan programa dezenvolvimentu rurál xave Austrália nian iha Timor-Leste no harii bazeia ba programasaun ne’ebé estabelese envolvimentu kle’an hosi komunidade rurál sira.

Programa ne’e la’o daudaun iha suku 66 iha munisípiu tolu hanesan Baucau, Bobonaro no Viqueque, ho foku prinsipál atu hadi’a di’ak liután seguransa ai-han no nutrisionál uma-kain sira no ajuda família rurál sira atu partisipa iha merkadu agríkola rentável.

“Governu Austrália iha kompromisu serbisu hamutuk ho Ministériu Agrikultura no Peska atu suporta Timor-Leste nia prioridade iha área agrikultura no orsamentu ne’ebé ami fó apoiu kada tinan millaun $5,” tenik Peter Roberts, foin lalais ne’e, iha salaun MAP, Comoro.

TOMAK hahú iha juñu 2016 no sei ezekuta iha períodu inisiál tinan-lima, ho posibilidade atu estende tan ba tinan-lima adisionál to’o 2026.

Haktuir iha Orsamentu Jerál Estadu (OJE), liuhosi programa TOMAK kada tinan aloka $944.071 ba kada munisípiu hanesan Baucau, Bobonaro no Viqueque, hodi dezenvolve agrikultura ba prosperidade.

Embaixadór ne’e nota, durante ne’e Governu liuhosi MAP koordena ho parseiru hotu hodi serbisu hamutuk suporta Timor-Leste nia prioridade iha setór agrikultura, tanba ne’e Austrália prontu nafatin serbisu hamutuk.

“Ami prontu serbisu hamutuk ho MAP hodi kontinua suporta nafatin setór agrikultura tanba setór ne’e importante duni ba Timor-Leste nia futuru no dezenvolvimentu tanba ema barak maka depende ba agrikultura,” nia realsa.

Diplomata ne’e dehan, parseiru nia knaar maka serbisu hamutuk ho Timor-Leste hodi suporta nafatin iha prioridade setór agrikultura.

Tanba ne’e parseiru sira hamutuk ho MAP hodi armoniza no buka dalan di’ak liu atu dezenvolve setór agrikultura iha Timor-Leste.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here