Irrigasaun. Imajen/Espesiál

DILI, 26 jullu 2020 (TATOLI) – Ministru Agrikultura no Peska, Pedro Reis, hateten orsamentu hosi Fundu COVID-19 aloka ona millaun $2,25 ba irrigasaun no ekipa tékniku sira foin la’o semana ida hodi identifika irrigasaun hira maka presiza hadi’a no ho kustu hira.

Proposta Ministériu Agrikultura no Peska (MAP) ne’ebé prevee iha Fundu COVID-19 hamutuk millaun $4,9.

“Agora daudaun ekipa tékniku la’o hela iha Timór laran tomak hodi haree ba irrigasaun ki’ik-oan ne’ebé a’at atu hadi’a hotu, nune’e bee bele halai tama ba natar,” tenik Ministru Pedro Reis, foin lalais, iha salaun MAP, Comoro.

Nune’e mós, Governante ne’e dehan, ekipa tékniku sira haree hotu ba irrigasaun ne’ebé mota sobu durante inundasaun iha fulan-maiu.

Udan boot iha loron 22 maiu iha parte Kosta Súl no Leste to’o provoka inundasaun, halo povu agrikultór sira hetan impaktu tanba irrigasaun no natar hetan estragu, tanba ne’e Governu liuhosi MAP buka hela meiu hodi rezolve problema hirak ne’e.

“Ami koko hasa’e produsaun no organiza agrikultór sira tenke kuda. Ami halo tanba orsamentu Fundu COVID-19 ne’ebé aloka ba irrigasaun hamutuk millaun $2,25, tanba ne’e presiza jere ho di’ak hodi bele hadi’a hotu irrigasaun iha Timór laran tomak ne’e,” nia subliña.

Tuir dadus hosi Diresaun Jerál MAP, durante dezastre naturál foin lalais, kanál irrigasaun hanesan Larisula Manufahi, Karau-ulun, Webaba no Suai Kasa, inklui irrigasaun ki’ik-oan sira seluk tan maka hetan estragu tanba mota sobu inklui natar.

Kanál irrigasaun boot iha área Larisula foin mak halo iha tinan kotuk no iha poténsia ektare 700, daudaun kuda hela hare kuaze ektare 400.

Iha área irrigasaun iha Larisula 01 nian, kuaze metru 15 mak hetan estragu totál, enkuantu irrigasaun Webaba hare ektare 13 maka hetan estragu totál.

Irrigasaun Webaba parte Suai Loro nian, natar hamutuk ektare 230 mak mota sobu maibé sei bele salva ho razaun seidauk to’o hare Susu-ben (kabuki) no seidauk tama hare Tasak.

Daudaun ne’e, MAP halo intervensaun ho ekipamentu hanesan eskavatór neen hodi ajuda povu sira ke’e bee dalan, nune’e bele halo normalizasaun ba bee no haruka buka tan kontainer balun hodi ense rai-henek hodi taka bee dalan husi mota ninin ne’ebé amaesa ba povu nia natar.

MAP mós sei haruka kontentór haat hodi ense rai-henek nakonu hodi satan bee hodi labele suli tama ba natar-laran ho kuantidade barak.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here