Lider Karizmátiku, Kay Rala Xanana Gusmão, hakru’uk hodi simu rei hosi avó-feto ida bainhira nia vizita ba Munisípiu Covalima, sesta (05/06/2020) Imajen/Eugénio Pereira.

BOBONARO, 25 jullu 2020 (TATOLI)- Lider Karizmátiku, Kay Rala Xanana Gusmão, hato’o parabéns ba Agência Tatoli, Institutu Públiku (IP) ne’ebé selebra aniversáriu ba dahaat (27 jullu 2016 – 27 jullu 2020).

Notísia Relevante : Aniversáriu Agência TATOLI, Jornalista Tenke Uza Terminolojia Ne’ebé Loos ba “Ema ho Defisiénsia Sira”

Aproveita momentu natalísiu Tatoli nian ne’e, Xanana husu atu hala’o ninia funsaun kaer metin prinsípiu no xefe importante hitu (7) hodi manan konfiansa públiku atu fiar TATOLI nia notísia tomak bele sai referénsia ba Estadu no ba públiku.

Eis Jornalista A Voz de Timor  ne’e afirma katak xefe importante hitu ne’e sai prinsípiu  fundamentu no devér  ba jornalista TATOLI no jornalista mundu tomak atu fó sai informasaun ho akurasia, rigor, independente, inzenta, klareza, integridade no kredibilidade.

 “Ha’u hato’o parabéns ba aniversáriu dahaat TATOLI nian, ne’ebé sei hala’o iha loron segunda 27 jullu mai ne’e, parabéns ba imi, parabéns ba imi hotu nia esforsu, ema hotu apresia imi nia servisu, tanba kaer tuir prinsípiu ne’ebé regula ka orienta TATOLI ninia ezisténsia hodi fó informasaun ba públiku ho rigor ho independénsia. Ida ne’e importante tebe-tebes independénsia, tanba kuandu ita temi ona independénsia, katak, la sees ba ne’ebá, la baku ba ne’ebá.  Tanba Izensaun jornalistika ne’e importante tebes hodi hetan fiar hosi públiku,” hateten Xanana Gusmão, ba jornalista Agência Tatoli, ohin, iha Suku Ritabou, Postu Administrativu Maliana, Munisípiu Bobonaro.

Xanana dehan, bainhira TATOLI ho ekipa jornalista tomak haklaken servisu ho profisionál hodi fó sai informasaun tomak ba atividade ne’ebé Estadu halo hodi buka liberta povu no rekolla informasaun hodi hato’o fali ba Governu buka rezolve problema sosiál sai nu’udar knaar importante ba jornalista iha TATOLI hodi kontribui informasaun ba dezenvolvimentu Estadu atu liberta povu hosi mukit.

“Integridade hosi Agência TATOLI nu’udar agência estatál ida ne’ebé tuir públiku nia haree hato’o saida maka públiku sente ba Estadu no públiku tomak no saida maka Estadu atu halo ba fali mós públiku,” Xanana hateten.

“Ho regra sira ne’e iha ne’ebé imi hatudu imi nia servisu maka bele fó kredibilidade ba agência estatál Estadu nian hanesan TATOLI.  Ne’e ha’u husu atu hato’o informasaun ho rigor, izensaun klaru ka klareza no ida ne’e maka bele hatudu imi iha integridade ema hotu bele fiar atu hato’o informasaun hodi públiku bele fiar iha TATOLI  no ha’u fó parabéns ba imi, servisu nafatin hodi TATOLI ohin loron nian bele sai agência ne’ebé kredivel ba futuru. Viva TATOLI,” dehan Xanana Gusmão.

Xanana hato’o mós agradese ba esforsu Governu Timor-Leste hodi harii TATOLI nu’udar agência ofisiál Governu Timor-Leste hodi divulga informasaun sira ne’ebé liga ho servisu Estadu no sosiedade nia moris.

TATOLI,IP nu’udar transformasaun hosi ETNA (East Timor News Agency) ne’ebé nakfilak ba TATOLI. Agência notisioza ne’e aprova iha Konsellu Ministru no publika iha Jornál Repúblika iha loron 16 marsu 2016 nu’udar embriaun ho naran ANTIL.

Ezisténsia TATOLI ne’e lansa hosi eis Primeiru-Ministru, Rui Maria de Araújo iha loron 27 jullu 2016.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here