Komandante Jerál PNTL, Komisáriu Faustino da Costa, hasai fotografia hamutuk ho formandu Kursu Promosaun Ofisiál Superiór (KPOS) hosi F-FDTL no PNTL na’in 29. Imajen/PNTL

DILI, 25 jullu 2020 (TATOLI) – Formandu Kursu Promosaun Ofisiál Superiór (KPOS) hosi FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) na’in-29 halo estudu komparativu iha Komandu Jerál PNTL, Caicoli, Dili.

Estudante sira hosi kursu 5º KPOS na’in-29 kompostu hosi PNTL ho Postu Inspetór Xefe na’in-sia (9) no F-FDTL ho Postu Kapitaun na’in-20, hala’o vizita ba Komandu PNTL no Komandu F-FDTL iha ámbitu hodi kompleta sira-nia matéria administrasaun ne’ebé hala’o ona hosi Unidade Kurrikulár (UC) Organizasaun Militár nian ba formadu sira hodi kompleta sira-nia estudu antes gradua.

Objetivu vizita ne’e hodi buka hatene no karateriza enkuadramentu lejizlativu defeza no seguransa RDTL.

Diretór Diresaun Servisu Ensinu no Formasaun Tenente Koronél “Punufanu” hateten, vizita ne’e ho nia objetivu atu rekolla dadus no informasaun hodi kompleta sira-nia matéria individuál ne’ebé sira simu ona atu dezenvolve iha tempu oin mai.

“Ami halo programa vizita iha fatin hotu hodi foti dadus ne’ebé instituisaun sira fó hanesan Komandu PNTL no F-FDTL, inklui Komandu Unidade sira,” hateten Tenente Koronél Punufanu.

Nia hatutan, matéria ne’ebé sira hetan durante kursu tinan ida hahú iha fulan fevereiru no sei remata iha dezembru nia laran maka kona-ba área operasaun, lojístika ho administrasaun.

Alende ne’e, sira mós tuir kursu ida ne’ebé hanaran Post Graduasaun Mestradu ba área estratéjia ne’ebé hanorin hosi Profesór na’in-10 husi Universidade Lizboa.

“Ita nia esperansa ho kursu ne’e bele prepara sira atu sai komandante di’ak ida ne’ebé preparadu bainhira sira remata kursu no fila ba servisu bele prontu ona atu komanda batallaun, sai Segundu komandante batallaun ka sai komandante operasionál iha batallaun nia laran, inklui sai komanda kompañia independente,” hateten Punufanu liuhosi komunikadu imprensa ne’ebé Agência Tatoli asesu iha Komandu PNTL.

Iha fatin hanesan, Komandante Komandu Administrasaun PNTL,  Superintendente Xefe, José Soares hateten, iha vizita ne’e Komandu PNTL aprezenta matéria balun kona-ba rekursu umanu, rekursu lojístika no rejime promosaun.

Formadu sira mós halo vizita ba departamentu no diresaun sira iha Kuartél Jerál PNTL hanesan Sentru Nasional Komunikasaun (NOK), Servisu Investigasaun Kriminál Nasionál (SIKN) Diresaun Tránzitu Seguransa Rodoviáriu Nasional (DTSRN) no Polisiamentu Komunitária (POLKOM).

Vizita sira-ne’e bele partilla servisu Polísia nian iha kuartél jerál no munisípiu atu nune’e forsa rua ne’e bele partilla informasaun no koñesimentu ba malu atu membru hosi instituisaun rua ne’e garante estabilidade seguransa rai laran, atu nune’e, fó espasu ba dezenvolvimentu ba país ida ne’e .

Kona-ba partisipasaun membru PNTL ne’ebé mínimu liu eis Komandante munisipiu Baucau ne’e esplika emprinsipiu Komandu PNTL hakarak prienxe kuota 20 ne’ebé maka IDN fó maibé PNTL nia Ofisiais Inspetór sira falta koñesimentu Lingua Portugés no razaun seluk maka balu asume hela kargu balun, maibé Komandu esforsu hodi oferese kursu Portugés ba Ajente no Sarjentu sira, maibé ba inspetór sira rekursu tempu mínimu tebes ba sira atu hola parte iha kursu tanba sira servisu hela iha terrenu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here