Xefe Suku Vila-Maumeta, Postu Administrativu Ataúro, Filipe Ximenes. Imajen/Espesiál.

DILI, 23 jullu 2020 (TATOLI)–Xefe Suku Vila-Maumeta, Postu Administrativu Ataúro, Filipe Ximenes, apresia no agradese ba Agência TATOLI,I.P ne’ebé durante ne’e sempre públika informasaun oin-oin hosi rai laran ho forma foun. 

Notísia Relevante: Agência TATOLI Labele Sentraliza De’it iha Dili Maibé Tenke Habelar Liras ba Munisípiu

Durante ne’e, xefe suku ne’e hateten, komunidade sira iha Ataúro sempre akompaña notísia sira hosi TATOLI tanba notísia foun sira sempre lais no kredível, no durante ne’e TATOLI mós sempre fó sai komunidade Ataúro ninia difikuldade. 

“Ha’u hanesan autoridade lokál, reprezenta ha’u-nia komunidade iha Suku Vila-Maumeta hakarak hato’o ami-nia parabens ba Agência TATOLI,I.P ne’ebé mak sei selebra ninia aniversáriu ezisténsia ba dahaat (IV) iha loron 27 fulan jullu tinan ne’e. Durante ne’e, ami iha Ataúro sempre akompaña notísia sira hosi TATOLI tanba notísia foun sira sempre lais no kredivel. Ha’u hato’o agradese tanba durante ne’e, TATOLI mós sempre fó sai ami-nia komunidade Ataúro ninia difikuldade,” dehan Filipe Ximenes ba Agência TATOLI liuhosi telefónika, sesta ne’e.

Filipe rekoñese, katak durante ne’e TATOLI ajuda tebes nia iha informasaun ne’ebé loos no kredivel.

“Durante ne’e ha’u sempre akompaña informasaun barak hosi media sosiál ne’ebé halo ha’u dúvida barak maibé ha’u sempre konsulta hosi TATOLI atu bele hetan informasaun ne’e ninia verdade loloos no ha’u sempre hetan informasaun loos hosi TATOLI. Tanba ne’e, hanesan autoridade lokál apresia tebes ho ajénsia TATOLI,” nia haktuir. 

Tanba ne’e, xefe suku ne’e lori komunidade nia naran, hakarak sujere ba TATOLI atu iha futuru bele halo liután kobertura iha Ataúro tanba rai ketan ne’e sei enfrenta difikuldade barak, hanesan bee-moos no seluk tan.

Entretantu, iha estatutu hateten Agência TATOLI,I.P nu’udár ajénsia ofisiál estadu Timor-Leste nian no nia ezisténsia maihosi inisiativa Sekretáriu Estadu Komunikasaun Sosiál (SEKOMS) iha tinan 2012-2017.

Ajénsia estadu ne’e hetan aprovasaun iha Konsellu Ministru no publika iha Jornál, Repúblika iha loron 14 fulan marsu 2016, nu’udár embriaun ho naran ANTIL ne’ebé lansa hosi Primeiru-Ministru, Rui Maria de Araújo, iha loron 27 fulan Jullu 2016 no iha fulan marsu 2017, Konsellu Ministru aprova ANTIL sai Tatoli, nu’udár ajénsia ofisiál Estadu Timor-Leste nian no públika iha Jornál Repúblika.

Jornalista : Cipriano Colo

Editór      :  Cancio Ximenes

HAKEREK NO HATÁN

Please enter your comment!
Please enter your name here