Ekipa redasaun Naunil Media hasai fotografia hamutuk Ministru Asuntu Parlamentár no Komunikasaun Sosiál, Francisco Jerónimo no ekipa, iha edifísiu Naunil Media, Taibesi, sesta (24/07). Imajen/Natalino Costa

DILI, 24 jullu 2020 (TATOLI) – Ministru Asuntu Parlamentár no Komunikasaun Sosiál (MAPKOMS), Francisco Jerónimo, enkoraja jornalista Naunil Media atu konfinua oferese informasaun kredível no akompaña prosesu dezenvolvimentu.

“Ha’u atu enkoraja imi jornalista atu hatudu-an hanesan jornalista hodi hato’o nafatin informasaun ne’ebé kredível, atu nune’e públiku bele akompaña nafatin informasaun ne’ebé di’ak no bele hatene situasaun relasiona ho progresu dezenvolvimentu ne’ebé la’o iha ita-nia rai,” tenik Ministru Francisco bainhira halo vizita kortezia iha Mídia Naunil, iha sesta ne’e, iha Taibesi.

Governante ne’e husu mídia sira labele halo notísia sensasionál no halo públiku sai pániku.

“Mídia sira labele konvida ema atu sai antipatia ba sira-nia informasaun, maibé tenke oferese informasaun kredível nune’e públiku nia konfiansa iha nafatin ba informasaun sira,” Ministru fó hanoin.

Biban ne’e, nia parte kontente tanba ho bizita ne’e bele haree direta kondisaun no difikuldade ne’ebé mídia online ne’e enfrenta durante ne’e.

“Ha’u-nia vizita ne’e katak atu hakbesik-an ba mídia sira hodi haree direita difikuldade mísia ninian atu ita ba oin bele buka solusaun,” nia subliña.

Ministru Francisco nota katak Naunil Media sei iha difikuldade ba fasilidade komputadór hodi halo serbisu no husu ajudu fundu balun.

“Governu sei la apoia materiál ba mídia sira tanba bainhira apoia buat hotu entaun mídia la krítika ona, maibé Governu iha meiu balun atu tulun mídia sira liuhosi kapasitasaun jornalista sira,” nia akresenta.

Iha fatin hanesan, Diretór Naunil Media, Julito Ximenes, relata maski hasoru dezafíu no difikuldade maibé Naunil kontinua eziste hodi oferese informasaun ba públiku.

Biban ne’e, nia parte apresia vizita MAPKOMS hodi haree direta kondisaun.

“Ami agradese tebes ba Ministru tanba ho vizita ne’e bele observa direta ami-nia fatin, nune’e ba oin bele tau konsiderasaun,” Dirijente ne’e subliña.

Nune’e mós, Xefe Redasaun Naunil Media, Vitorino Lopes, hateten maski iha situasun COVID-19 maibé jornalista Naunil Media firme nafatin halo kobertura.

“Iha situasun COVID-19 jornalista Naunil kontinua hatudu firme ho espíritu hodi ba kobertura no kontribui informasaun liuhosi publikasun notísia,” nia realsa.

Nia husu MAPKOMS atu aselera subsídiu ba jornalista liña frente no pagamentu subsídiu insentivu hosi Governu ba mídia sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here