Veíkulu Polísia. Imajen/PNTL

DILI, 24 jullu 2020 (TATOLI) – Vise-Ministru Interiór, António Armindo, husu ba membru Polísia Nasionál Timor-Leste (PNTL) atu uza veíkulu sira hodi halo serbisu ho responsabilidade, tanba daudaun PNTL iha dívida barak ne’ebé maihosi transporte ninian, hanesan manutensaun ba karreta no kombustível.

Desde 2015 to’o 2019, PNTL iha dívida hamutuk millaun $2,7, ne’ebé tuir relatóriu hosi Komandu PNTL maioria dívida hosi bens servisu maka barak, inklui orsamentu ba kombustível, ba ofisina halo manutensaun ba transporte, ba kompañia telekomunikasaun Telemor ne’ebé halo manutensaun ba kamera CCVT, ba Eletricidade de Timor-Leste (EDTL) no seluk tan.

“Agora daudaun ami haree atu halo reforma, tanba hakarak haree lei atu hadi’a, nune’e iha futuru labele akontese tán. Ha’u-nia hakarak maka ema uza veíkulu, kombustível sira ne’e tenke kuidadu, loos duni katak kuandu uza karreta tenke iha kombustível maibé tenke uza ho kuidadu no responsabilidade nune’e diminui dívida,” dehan governante ne’e iha Palásiu Governu, sesta ne’e.

Notísia Relevante: Komisaun B Buka Solusaun Ba PNTL Nia Dívida Millaun $2,7

Iha loron 09 jullu, Komisaun B Parlamentu Nasional ba asuntu Defeza, Seguransa no Negósiu Estranjeiru halo audiénsia publika ho Komandu PNTL hodi buka solusaun ba dívida durante tinan haat nia-laran.

Iha biban ne’e, membru Komisaun B inklui ofisiál superiór Komandu PNTL ajusta ona planu orsamentu balun atu trata dívida sira iha proposta Orsamentu Jerál Estadu (OJE) 2020.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here