Sunu foer arbiru ne’ebé bele estraga ambiente. Imajen/Espesiál

DILI, 24 jullu 2019 (TATOLI) – Sekretáriu Estadu Ambiente (SEA) hamutuk ho liña ministeriál, Polísia Nasionál Timor-Leste (PNTL), inklui Autoridade Lokál hahú diskute prosedimentu legál atubele kriminaliza sidadaun ne’ebé estraga ambiente, hanesan kasa animál, sunu foer arbiru no seluk tan.

“Ita atubele implementa prosidementu legál ho rigór hodi kriminaliza infratór ambientál sira ne’e presiza liña ministeriál intende kona-ba kontiúdu hosi prosedimentu legál, tanba kódigu penál naton atubele halo kriminalizasaun ba infratór ambientál sira,” tenik Sekretáriu Estadu Ambiente, Démetrio do Amaral de Carvalho ba Agência Tatoli, sesta ne’e, iha ninia knaar fatin, Bebora.

Sekretáriu Estadu ne’e dehan, kazu balun ne’ebé komete hosi infratór ambientál, parte SEA konsege lori to’o autoridade kompetente maibé seidauk iha kazu ne’ebé bele lori to’o prosesu legál.

Ho nune’e, governante ne’e konsidera presiza duni hametin edukasaun kona-ba kuadru legál ambientál sira ba líder lokál no entidade relevante sira inklui liña ministériál sira ne’ebé mós tau matan ba krime ambientál.

“Ita kuandu iha kompreensaun hanesan ba kontiúdu kuadru legál ninian mak ita bele iha asaun hanesan ba kriminaliza infratór ambientál sira,” nia akresenta.

Faze ne’e, Eis Deputadu Bankada Partidu Libertasaun Populár (PLP) ne’e hakarak hases barreira ba implementasaun kriminalizasaun ne’e hodi hametin edukasaun ambientál, nune’e públiku no entidade reguladór sira komprende kona-ba kuadru legál ambientál nian.

“Bainhira prosede infrasaun ambientál ruma karik sira hatene atu halo investigasaun di’ak no mós halo prosesu legál hasoru infratór ambientál sira,” nia subliña.

Nia fó hanoin, bainhira atu prevene ka hamenus danos ambientál sira, presiza habelar edukasaun ambeintál, hametin prátika tara bandu no halulik bee-matan, mota, lagua, tasi ninin, tasi, foho no ekosistema natural sira.

Iha tempu hanesan, presiza hametin kuadru legál no kontrolu, kooperasaun entre institusaun ne’ebé metin iha sistema alerta sedu ba kestaun ambientál liuhosi Servisu Vijilánsia Ambientál Nasionál ida.

Nune’e mós, adopta siénsia no teknolojia ne’ebé fó solusaun ba problema ambientál inklui halo alokasaun rekursu ne’ebé naton ba kombate problema nasionál.

“Ita-nia Kódigu Penál artigu 215 too 221 sufisente ona atu kriminaliza infratór bainhira komete krime ambientál ho modura penál hahú husi tinan rua to’o 15 inklui selu multa,” nia informa.

Kódigu Penál artigu 215 kona-ba krime ambiente, ba dahuluk hateten ema ne’ebé hasoru dispozisaun legál ka regulamentár ne’ebé proteje ambiente, provoka ka halo direita ka indireita, emisaun, eskoamentu, radiasaun, extrasaun ka eskavasaun, ateramentu, ruídu, vibrasaun, injesaun ka depozitu iha atmosfera, iha solu ka bee terrestre, marítima ka sub-terranea, inkluidu iha zona fronteira, ka kaptasaun ba bee ne’ebé bele prejudika gravemente sistema naturál nia ekilíbriu sei hetan pena prizaun to’o tinan 3 ka multa.

Daruak, bainhira ajente dolozamente liberta, emite ka introdúz radiasaun ionizada ka substánsia seluk ba ar, rai ka bee marítima, kontinentál, superfisiál ka subterranea, ho kuantidade ne’ebé halo ema ida ka liután hetan ofensa korporál grave ne’ebé eziji tratamentu médiku ka sirúrjiku ka hamosu sekuela irreversível, sei hetan pena prizaun tinan rua to’o ualu no halo ema ruma mate karik, sei hetan pena prizaun tinan lima to’o 15.

Iha Kódigu penál artigu 217 kona-ba krime  hasoru Flora Fauna katak ema ne’ebé ho grave halo prejuízu ba meiu ambiente, tesi ai, sunu, fokit, rekoille ka halo tráfiku ilegál ba flora espesie ne’ebé hetan klasifikasaun hanesan ameasadu ka iha perigu atu hotu, ka espesie ne’ebé semente tanba destrui ka altera gravemente nia habitat naturál, sei hetan pena prizaun to’o tinan tolu ka multa.

Tuir Kódigu Penál artigu 219, ema ne’ebé prátika peska iha bee marítima nasionál no laiha lisensa husi Autoridade Administrativa Kompetente, sei hetan pena prizaun to’o tinan tolu ka multa.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here