Sekretáriu Estadu Ambiente, Demétrio do Amaral de Carvalho. Imajen Tatoli/Antnio Gonçalves

DILI, 24 jullu 2020 (TATOLI) – Relasiona ho aniversáriu Agência Tatoli ba dala-haat, Sekretáriu Estadu Ambiente (SEA), Demétrio do Amaral de Carvalho, observa durante ne’e mídia Estadu ne’e hatudu pasu pozitivu no satisfasaun boot, tanba serbisu ho profisionál ba eskrita kontiúdu notísia sira ho balansu iha publikasaun.

“Lori ha’u nia-naran rasik no Sekretaria Estadu Ambiente nia naran, fó parabéns ba ekipa tomak iha Agência Tatoli ne’ebé serbisu iha área ida importante  ne’e. Tanba ita halo buat ida ho nonok de’it maibé la konsege fó prátika di’ak ba ema seluk, entaun papél mídia ninian liuliu Tatoli nia papél importante iha prosesu dezenvolvimentu nasionál,” tenik Sekertáriu Estadu Demétrio ba Agência Tatoli iha ninia knaar fatin, Bebora, sesta ne’e.

Governante ne’e nota, mídia ne’ebé divulga notísia eskrita liuhosi plataforma online ne’e hatudu ona katak mídia ne’e la’ós de’it hanesan fonte distribuisaun notísia, maibé hanesan mós espasu ida ba edukasaun públiku.

“Ha’u akompaña durante ne’e Tatoli halo kobertura kona-ba atividade SEA relasiona ho ambiente nia servisu ho profisionál tebes,” nia akresenta.

Fundadór Mídia Rezisténsia TALITAKUM no UNER KALOHAN, dehan mídia online ne’e iha papél importante ida ba prosesu luta no dezenvolvimenntu nasionál, nune’e rekomenda ba Agência Tatoli atu hahú esforsu hodi hasa’e kultura ba interese lee iha Timor-Leste.

“Ita haree maioria populasaun timor-oan ninian inklui universitáriu sira nia interese lee ladún forte, ne’ebé ita sei presiza hari’i kultura interese ba lee liuhosi  aproveita espasu iha jerasaun mileniál,” nia sujere.

Sekretáriu Estadu Demétrio, husu ba Tatoli atu hahú kria ona live streaming tanba fásil liu atu públiku akompaña notísia sira husi ajénsia Estadu ne’e.

“Ha’u hanoin notísia online sira, di’ak liu estabelese ona live streaming tanba ohin loron ema ruma tama ba mídia sosiál hanesan youtube, facebook, WhatsApp ne’e kuandu fahe tutan notísia, automátikamente públiku bele asesu ona,” nia subliña.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here