Rajesh Pandev, representant WHO iha Timor Leste.Imajen/Antonio Goncalves

DILI, 24 jullu 2020 (TATOLI)-Organizasaun Mundiál Saúde (OMS), sesta ne’e halo worshop ida ba ekipa vijilánsia Nasionál, Ministériu Saúde  no Sentru Saúde Komunitária sira iha Munisípiu 12 inklui Rejiaun Administrativa Espesiál Oé-Cusse Ambeno (RAEOA) ba prevene COVID-19.

Worshop ne’e tema maka  desiminasaun, monitorizasaun no evalusaun kona-ba prontidaun ba COVID-19 ne’ebé hala’o iha Otél Timor Dili.

Reprezentante OMS iha Timor-Leste, Rajesh Pandev, iha ninia diskursu hakarak agradese no kongratula ba Ministériu Saúde tanba konsidera eventu ne’e importante hodi kombate moras coronavirus.

Nia dehan atividade evaluasaun ne’e implementa ona durante Estadu Emerjénsia husi fulan-maiu to’o juñu ne’e lilliu haree kona-ba kapasidade Timor-Leste maneja ninia rekursu no fasilidade hodi responde coronavirus.

”Ministériu Saúde iha ona liña frente no halo ona esforsu no mudansa maibé sempre iha nesesidade atu hadi’a no razaun ida ne’e mak ita realiza atividade ida ne’e ba Sentru Saúde Komunitaria sira mak sai hanesan liña protesaun dahuluk hodi mantein seguransa no saúde ba komunidade,” dehan nia.

Aleinde ne’e, evaluasaun ne’e importante atu haforsa servisu prevensaun iha Sentru Saúde Komunitáriu sira bele halo jestaun ba kazu, relata kazu iha tempu ezatu la’óz de’it ba moras COVID-19, maibé ba moras infesaun sira seluk.

“Kazu dahuluk husi COVID-19 konfirmadu iha loron 22 fulan-Marsu tinan 2020 hahú husi ne’ebá Ministériu Saúde aumenta nia kapasidade vijilánsia no responde ho suporta husi parseiru dezenvolvimentu sira esforsu fantástiku husi Governu no kolaborasaun di’ak ho parseiru sira no liña ministeriál  sira ne’ebé permite ita atu limita numeru kazu COVID-19 nian to’o de’it 24 no 3,700 ba leten ne’ebe teste ona,” katak Rajesh.

Maske Timor-Leste daudaun ne’e la rejista ona kazu foun ba coronavirus la signifika moras ne’e hotu ona maibé moras ne’e sei ejizte iha nasaun seluk tanba ne’e, nia alerta nafatin ba TL presiza kumpre nafatin medida prevensaun ne’ebé maka OMS fó sai ona liliu mantein distansia sosiál no uza máskara.

Ajénsia Kooperasaun Internasionál Korea (KOICA), maka oferese osan $ 50.000 hodi realiza worshop ne’e.

Durante worshop ne’e, OMS entrega mós ekipamentu hanesan laptop no mákina printer ba Diretór Saúde Munisípiu 12 inklui RAEOA.

Jornalista : Felicidade Ximenes

Editór        : Agapito dos Santos

HAKEREK NO HATÁN

Please enter your comment!
Please enter your name here