Vise-Ministru Interiór, António Armindo. Imajen/Dok. Tatoli

DILI, 24 jullu 2020 (TATOLI) – Ministériu Interiór (MI) no Sekretária Estadu Protesaun Sivíl (SEPS) define ona programa prioridade ba tinan 2021 ne’ebé sei foku liubá infraestrutura sira.

Vise-Ministru Interiór, António Armindo hamutuk ho Sekretáriu Estadu Protesaun Sivíl, Joaquim José Gusmão dos Reis Martins, hasoru malu ho Primeiru-Ministru no Ministru Interiór, Taur Matan Ruak, hodi ko’alia kona-ba programa prioridade ministériu rua.

“Ha’u ho Sekretáriu Estadu Protesaun Sivíl hasoru malu ho Primeiru-Ministru, ne’ebé hanesan mós Ministru Interiór hodi simu orientasaun kona-ba preparasaun ba Orsamentu Jéral Estadu (OJE) 2021 nian. Iha tinan oin ne’e, prioridade liu ba infraestrutura tanba ne’e mak orienta ona ami atu haree infraestrutura ne’ebé importante,” relata Vise-Ministru António Armindo hafoin ramata enkontru iha Palásiu Governu, sesta ne’e.

Tuir nia, infraestrutura ne’ebé sei sai prioridade mak infraestrutura iha Protesaun Sivíl no iha Ministériu Interiór, iha Servisu Migrasaun no Polisía Nasionál Timor-Leste (PNTL) rasik.

“Maibé ami sei ba haree direta mós kondisaun iha fronteira nian, nune’e bele tama iha kategoria infraestrutura no bele hadi’a di’ak liután. Iha PNTL nian sei inklui mós eskuadra PNTL Becora, postu Vulnerable Police Unit (VPU), migrasaun, no eskuadra Unidade Patrullamentu Ftonteira (UPF) sira,” nia subliña.

Governante ne’e dehan, semana oin sei tur hamutuk ho parte hotu hodi prepara proposta OJE MI, SEPS, inklui PNTL rasik.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here