Koordenadór AIFAESA, Abílio Oliveira Sereno. Imajen Tatoli/Egas Cristovão

DILI, 24 jullu 2020 (TATOLI) – Durante fulan-jullu nia-laran Autoridade Inspesaun Fiskalizasaun Atividade Ekonomia Sanitária, Institutu Públiku (AIFAESA,IP) halo inspesaun ba operadór ekonómika iha Dili laran no konsege taka temporáriamente balun.

Koordenadór AIFAESA, Abílio Oliveira Sereno, hateten durante fulan ne’e nia-laran autoridade ne’e konsege ensera temporária restaurante tolu no industria haat iha Dili laran.

Objetivu halo enseramentu ba operadór ekonómika hirak ne’e, bazeia ba Dekretu-Lei 28/2011, katak nain sira tenke halo ijene ba sira-nia fatin hodi hala’o atividade ekonomia no bainhira laiha ijene AIFAESA iha diretu halo enseramentu temporária.

“Iha fulan-jullu estabelesimentu hitu maka  ami taka, restorante rua taka antes no ohin ami taka lima, ne’ebé hamutuk hitu, kompostu hosi industria haat maka hanesan industria tahu rua no padaria rua inklui restaurante tolu, tanba tuir Dekretu-Lei 28/2011 sita katak bainhira laiha kondisaun ijene atu halo atividade industria maka tenke notifika, nune’e taka tiha atividade hanesan fa’an pão karik taka tiha sasán sira ne’ebé laiha ijene no hadi’a atu tuir,” tenik Abílio Oliveira, hafoin ensera industria pão Likintai iha Taibesi, sesta ne’e.

Koordenadór ne’e dehan, enseramentu temporária ne’ebé AIFAESA fó ba industria ka restorante nain sira, tuir dekretu lei fó durasaun fulan-tolu ba estabelesimentu ekonomia atu hadi’a didi’ak sira-nia fatin ne’ebé ladún ijene.

“Kondisaun ne’ebé sira presiza hadi’a maka hanesan iha industria ka restaurante ida foer labele iha, tenke ijene no fatin tenke seguru. Tanba ne’e maka ami fó durasaun fulan-tolu maibé  dalaruma la to’o fulan-tolu sira bele loke filafali, tanba antes to’o tempu ne’ebé fó maka sira halo tuir ona rekezitu ne’ebé hatúr, maka sira bele loke fali tanba tempu ne’ebé fó hanesan oportunidade ba sira hadi’a estabelesimentu,” nia subliña.

Iha oportunidade ne’e, koordenadór AIFAESA apela ba operadór ekonómika nain-sira iha munisípiu hotu katak bainhira halo atividade tenke la’o bazeia ba dekretu lei tanba la’ós vale de’it iha kapitál Dili maibé vale mós ba munisípiu hotu.

“Ha’u mós hakarak aproveita oportunidade ne’e atu fó mensajen, aleinde estabelesimentu ne’ebé opera iha kapitál Dili, aproveita mós informa ba sira ne’ebé iha munisípiu tanba sira tenke haree katak dekretu lei ne’e la’os vale de’it iha Dili maibé vale mós ba munisípiu tomak tanba ba oin AIFAESA  sei destaka ninia ema iha munisípiu sira atu halo inspesaun regulár loroloron hanesan mós iha Dili hodi haree ba ijene ai-han nian,” nia tenik.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here