DILI, 24 jullu 2020 (TATOLI) – Ministru Asuntu Parlamentár no Komunikasaun Sosiál (MAPKOMS), Francisco Jerónimo, ho ekipa vizita jornál diáriu, Dili Post hodi haree direta kondisaun no rona preokupasaun.
Nain ba Mídia Dili Post, Fernando da Silva, relata mídia emprimi ne’e hetan difikuldade krize finanseira tamba situasaun impase polítika no COVID-19.
“Ami ne’e atu dehan mate mós la mate, moris mós la moris tanba krize finanseira, hahú hosi situasaun polítika to’o mai COVID-19 halo menus rendimentu,” tenik Fernando da Silva, sesta ne’e, iha edifísiu Devita Group, Becora.
Tanba ne’e, nia husu ba Governu hodi bele insentiva fundu ruma ba mídia sira.
Hatan ba kestaun ne’e, Ministru Francisco hateten, Governu kontinua kompromisu atu hakbi’it mídia sira, tanba ne’e durante loron hirak ona nia parte halo vizita hodi bele haree direta kondisaun mídia sira.
“Jornalista sira dala barak hasoru ha’u no ohin hakarak mai haree sira-nia serbisu fatin no kondisaun direta. Governu nafatin apoia mídia no sei la taka matan ba mídia sira,” governante ne’e subliña.
Jornál Dili Post lansa iha loron 16 novembru 2018 no hahú publikasaun dahuluk 20 novembru 2018.
Mídia imprensa ho lema “Habelar no Haburas Demokrasia” ne’e hahú ho jornalista na’in-27 ne’ebé maka hala’o knaar.
Jornalista: Natalino Costa
Editora: Julia Chatarina
