Loja sidadsun iha fatin balun. Imajen/Espesiál

DILI, 23 jullu 2020 (TATOLI) – Ministru Administrasaun Estatál, Miguel de Carvalho hateten Governu liuhosi Ministériu Administrasaun Estatál (MAE) iha ona planu atu estabelese loja sidadaun, nune’e bele ajuda fó espasu ba sidadaun sira iha atendimentu públiku ho efisiénsia no efikásia iha fatin ida de’it.

“Governu pretende atu estabelese loja sidadaun iha fatin balun iha territóriu Timor-Leste nian, nune’e ein termu atendimentu públiku labele halo iha fatin diferente, ne’ebé la’o hosi fatin servisu públiku ida ba fatin servisu seluk no burokrasia barak liu,” dehan Ministru Miguel de Carvalho  iha edifísiu Ministériu Finansa, Aitarak-Laran, kinta ne’e.

Tanba ne’e, Governu iha ona planu atu estabelese loja sidadaun nune’e bainhira sidadaun sira halo atendimentu ba servisu públiku barak bele trata iha fatin ida de’it, ne’ebé bele promove efisiénsia no efikásia hosi servisu ne’e rasik,” Ministru subliña.

Governante ne’e informa, liuhusi fundu apoiu hosi Uniaun Europeia (UE), MAE hakarak implemeta planu ne’e.

“Ohin ami sei halo diskusaun ho Uniaun Europeia hodi haree indikadór sira ne’e, maibé kuandu ida ne’ebé di’ak no bele halo, ita bele atinje ona liuhosi planu sira ne’ebé iha ona,” nia haktuir.

UE apoiu ona orsamentu millaun $7,6 ba Governu Timor-Leste ne’ebé foin daudaun transfere ona ba konta Estadu, hodi finansia atividade prinsipál tolu hanesan Jestaun Finansa Públika, Nutrisaun no Desentralizasaun no fundu ne’e sei integra iha orsamentu estadu.

Orsamentu ne’e sei aloka millaun $4 ba Ministériu Finansa (MF), millaun $2,2 ba Ministériu Saúde (MF) no millaun $1,4 ba MAE.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here