Presidente Institutu Nasionál Seguransa Sosiál (INSS) Longuinhos Armando. Imajen/Egas Cristovão

DILI, 24 jullu 2020 (TATOLI)–Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, hateten pagamentu ba idozu no invalidez sira ne’e hala’o iha 20 jullu maibé Governu sei estende tan fulan ida no pagamentu ne’e sei hahú iha 01 agostu tinan ne’e.

“Ita estende tan fulan ida ba pagamentu idozu no invalidez tanba iha fulan junu, ita-nia Governu halo fali pagamentu subsídiu $100 ba família uma-kain iha programa COVID-19 nian, nune’e 01 agostu Governu hahú ona halo pagamentu ba idozu sira ne’e,” Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, ba jornalista sira iha nia servisu fatin INSS, Caicoli, Dili, seste ne’e.

Razaun seluk, nia dehan, ema ne’ebé mak atu simu subsídiu $100  ne’e hanesan ho idozu no invalidez, entaun rua labale halo pagamentu ne’ebé hanesan iha fulan ida nia-laran.

“Ita sei utiliza ema ne’ebé mak hanesan ho banku ne’ebé mak hanesan mak Banku Nasionál Komérsiu Timor Leste (BNCTL sigla portugés) inklui mós ekipa tékniku ne’ebé involve hotu ba prosesu pagamentu, tanba ne’e mak ita hanoin tenke estende pagamentu refere,” nia dehan. 

Tuir loloos, nia informa, pagamentu ba idozu sira ne’e hala’o iha loron 20 jullu liubá ne’e maibé ho razaun hirak ne’e labele tanba presiza tempu atu konklui dadus hotu no sei koordena tan ho BNCTL, entaun estende ba loron 01 agostu.

Prezidente INSS ne’e hateten, bazea ba dadus ne’ebé mak iha no atu simu pagamentu ne’e, purvolta rihun $ 82 no rihun $17-20 mak pendente hela tanba laiha movimentu.

“Bainhira sira mai complain fali, ita sei prosesu fali dadus no normaliza pagamentu ba sira,” nia dehan. 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here