Embaixadór Austrália iha Timor-Leste, Peter Roberts. Imajen Tatoli/Egas Cristovão

DILI, 24 jullu 2020 (TATOLI)–Embaixadór Austrália, Peter Roberts, hateten Governu Austrália ajuda osan purvolta rihun $600-resin ba Governu Timor-Leste hodi fasilita programa ne’ebé liga ho Coronavirus (COVID-19).

“Austrália fó ajuda osan purvolta rihun $600 ba Governu Timor-Leste hodi fasilita programa prevensaun ba Coronavirus (COVID-19),” dehan Embaixadór Austrália, Peter Roberts, ba jornalista sir, hafoin hala’o enkontru ho Vise Primeiru-Ministru iha MSSI, Caicoli, Dili, sesta ne’e.

Nia dehan, Governu Austrália servisu hamutuk ho ekipa Vise Primeiru-Ministra tomak ho Ministériu Solidaridade Sosiál no Inkluzaun (MSSI) hodi responde ba situasaun Coronavirus (COVID-19) iha Timor-Leste.

“Governu Austrália fó apoiu tékniku, suporta pagamentu subsídiu $100 ba família uma-kain no ita kontinua servisu hamutuk ho MSSI atu nune’e bele responde ba impaktu sosiál hosi Coronavirus ne’e. Tanba ne’e mak ohin hala’o enkontru ho Vise Primeiru-Ministru, Armanda Berta dos Santos, hodi ko’alia kona-ba kooperasaun entre Timor-Leste ho Austrália, partikularmente iha área solidaridade sosiál,” nia dehan.

Aleinde ida ne’e, nia hateten, Governu Austrália mós ajuda programa nabilan ne’ebé servisu hamutuk mós ho MSSI hodi luta kontra violénsia feto no labarik sira. Programa ne’e, sei kontinua nafatin iha situasaun Coronavirus no Governu Austrália nafatin iha komitmentu boot atu kontinua iha área refere.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here