Embaixadór Uniaun Europeia ba Timor-Leste, Andrew Jacobs. Imajen Tatoli/António Gonçalves

DILI, 24 jullu (TATOLI) – Embaixadór Uniaun Europeia  (EU) ba Timor-Leste, Andrew Jacobs, informa nia parte iha kompromisu atu dada kompañia Europeia sira mai investe iha área pontesiál sira iha Timor-Leste.

“Ha’u mós hakarak atu dada kompañia Europeia sira atubele mai investe iha Timor-Leste”, tenik Embaixadór UE ba Agência Tatoli, foin lalais ne’e, iha ninia knaar fatin, Palm Bussiness Center, Surikmas Fatumenta.

Diplomata ne’e dehan, hakarak dada investór sira mai Timor-Leste hodi investe iha setór potensiál hanesan iha mina no gás, área agrikultura, peska, minerál no turizmu.

“Ha’u sente presiza mós hatene katak Timor-Leste tenke iha negósiu seluk no industriál seluk tanba ha’u hanoin ida-ne’e oportunidade ne’ebé maka di’ak, la’ós de’it ba Timor-Leste maibé mós ba Uniaun Europeia nia kompañia sira ne’ebé maka atu mai investe iha indústria foun iha Timor-Leste,” nia subliña.

Biban ne’e, nia hato’o katak UE hakarak ajuda mós dezenvolve setór privadu sira hodi kria ambiente investimentu tanba daudaun ne’e laiha kompañia atu halo investe iha Timór.  

“Tanba investe iha Timor-Leste komplikadu no defísil tebes atu impresta osan hosi banku. Maibé Uniaun Europeia mós ko’alia kona-ba akordu ekonomia tanba Timor-Leste presiza iha oportunidade iha ambiente ne’ebé koñese ekomomia hodi bele harii indústria ne’ebé buras no bele prodúz osan,” realsa diplomata ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here