Komisáriu CAC, Sérgio Hornai. Imajen Tatoli/Cipriano Colo

DILI, 24 jullu 2020 (TATOLI) – Komisaun Anti-Korrupsaun (CAC-sigla portugés) kontinua halo investigasaun ba kazu 18 iha indísiu ba krime korrupsaun ne’ebé deskonfia komete hosi ajente administrasaun públika iha instituisaun Estadu nian balun.

Komisáriu CAC Sergio Hornai, informa, iha inísiu janeiru to’o jullu, tinan ne’e, CAC rejista kazu indísiu ba krime korrupsaun hamutuk 38. Hosi númeru ne’e iha kazu foun 21 no kazu pendente hosi tinan 2019 iha kazu 17.

Hosi númeru kazu ne’e CAC simu delegasaun kompeténsia hosi Ministériu Públiku hamutuk 14 no restu mai hosi instituisaun Estadu sira seluk.

“Relatóriu final ne’ebé iha hodi konklui ona investigasaun hosi númeru kazu pendente 2019 no kazu foun 2020 purvolta 20 no ita hato’o ka remesa ona ba iha Ministériu Públiku no daudaun ne’e kontinua halo investigasaun ba kazu hamutuk 18,” informa Komisáriu CAC, Sergio Hornai, ba Agência Tatoli, ohin, via telefone.

Nia hatutan, hosi abreviguasaun investigasaun ne’e hodi bele hetan nia verasidade atu nune’e bele kompleta liu tan dadus balun hafoin hato’o ba iha Ministériu Públiku, ne’ebé hanesan na’in ba asaun penál hodi kontinua prosesa lei ne’ebé vigora.

Sergio Hornai hatutan, hosi kazu sira ne’ebé iha hanesan krime pasiva, aktu ilísitu, pekulatu, pekulatu uzu, abuzu podér, partisipasaun ekonómika, administrasaun danoza, burla no sira seluk tan.

“Marjen ka krime ne’ebé barak liu mak krime pasiva no pekulatu,” hateten Komisáriu CAC, Sergio Hornai.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here