Komísariu CAC, Sergio Hornai. Imajen/Egas Cristóvão

DILI, 24 jullu 2020 (TATOLI) – Komisáriu Komisaun Anti-Korrupsaun (CAC-sigla portugés), Sergio Hornai, elojia ka apresia ho servisu no kobertura Agência Noticiosa de Timor-Leste, Tatoli, Institutu Públiku, nian durante ne’e iha area judisiáriu.

Notísia Relevante : TATOLI Tenki Halo Kobertura Mós iha Rai-Liur

“Ha’u hanoin Tatoli kontribui tebes tanba sempre hasai informasaun sira ne’ebé atualizadu ba iha komunidade hodi akompaña iha prosesu judisiáriu, hahú hosi prosesu investigasaun, akuzasaun to’o ba iha Tribunál komesa lao ativu. Ida-ne’e ha’u hakarak elojia ba iha servisu hirak ne’e, nune’e lori CAC nia naran fó parabens ba iha komemorasaun aniversáriu Agência Tatoli ba dahaat, 27 jullu 2020,” hateten Komisáriu CAC, Sergio Hornai, ba Tatoli, ohin, via telefone.

Tuir nia, ida ne’e faz parte ba Agência Tatoli, jornalizmu investigativu oinsá mak deskobre ba iha kestaun ruma ne’ebé koloka iha interese públiku ninian.

Sergio Hornai hateten, ho proposta lei Medida Prevensaun no Kombate Korrupsaun (MPCC-sigla portugés) ne’ebé daudaun ne’e hein promulgasaun hosi Prezidente Repúblika, kuandu vigor ona, hanesan iha artigu balun prevee ona, CAC sei servisu hamutuk ho TATOLI no órgaun komunikasaun sosiál sira seluk hodi halo divulgasaun ba promove prevensaun ba korrupsaun no jornalizmu investigativu.

“Hein katak Tatoli halo nafatin servisu investigativu. Fó notísia ne’ebé mak kredivel ho lalais atu nune’e fó informasaun ba komunidade,” tenik Komisariu Sergio Hornai.

Komisáriu CAC hatutan, ba oin CAC ho TATOLI presiza halo kooperasaun hametin liu tan, hodi intensifika divulgasaun informasaun ativu.

Sergio Hornai husu ba jornalista sira presiza profesionaliza liután hodi aprende no estuda barak fó sai notísia ne’ebé kualidade liu tan, atu nune’e, bele manan konfiansa iha komunidade nasionál no internasionál.

Nia mós husu mantén informasaun sira ne’ebé atu fó sai tenke kredivel, independente  no rigor.

Ba ministériu tutela, CAC husu atu  fó nafatin apoiu ba Tatoli, nune’e bele mellora liután  servisu  no kualifikasaun ba ema no ekipamentu sira atu bele moderniza liu tan mídia estatál ne’e.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here