Bee-moos. Imajen/Espesiál

DILI, 24 jullu 2020 (TATOLI) – Aldeia Ailok-Laran, Suku Hera, Postu Administrativu Cristo Rei, Munisípiu Dili, ho populasaun hamutuk 478, durante tinan-13 nia laran seidauk asesu ba bee-moos.

Komunidade Aldeia Ailok-Laran, Joni Mendes, haktuir desde tinan-2007 komunidade ne’ebé hela iha Aldeia Ailok-Laran to’o agora seidauk asesu ba bee-moos.

Komunidade Aldeia Ailok-Laran, Joni Mendes. Imajen/Natalino Costa

“Ami iha preokupasaun kona-ba bee-moos. Ami preokupa tanba durante ne’e hahú hosi tinan-2007 to’o agora seidauk asesu bee-moos no ami iha ne’e sosa rasik, dalaruma ami ba kuru iha maluk balun ne’ebé sira-nia uma iha sániu,” tenik Joni, sesta ne’e, iha Hera.

Tuir komunidade ne’e, sira hato’o ona preokupasaun ba parte relevante maibé to’o agora seidauk iha rezultadu, tanba ne’e nia husu Governu tau atensaun.

Iha fatin hanesan, Xefe Aldeia Ailok-Laran, Rafael Soares Ribeiro, hateten sira hato’o ona preokupasaun maibé seidauk iha resposta.

“Durante ne’e komunidade sosa rasik bee-moos hodi konsumu, maske ami hatama ona proposta ba Governu maibé to’o agora seidauk atende,” relata Rafael.

Xefe Aldeia Ailok-Laran, Rafael Soares Ribeiro. Imajen/Natalino Costa

Nia mós konta tuir, parte Governu ba verifika beibeik ona fatin ne’ebé komunidade hela.

“Ami-nia proposta ne’ebé hatama ba ministériu relevante durante tinan-tolu ona maibé to’o agora seidauk iha resposta. Sira rasik mai promete ba ami dehan atu fura bee-moos ba ami sira ne’ebé hela iha ne’e tenke hetan hotu, maibé realidae ami-nia komunidade kontinua halerik ba bee-moos,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here