Logo UNFPA.

DILI, 23 jullu 2020 (TATOLI)-United Nations Population Fund (UNFPA), kinta ne’e asina ona nota intendimentu (MoU-sigla inglés) ho Servisu Autónomu Medikamentu no Ekipamentu Saúde (SAMES), hodi fornese ai-moruk no ekipamentu no mós ajuda hadi’a kontrasepsaun ba planeamentu familiar.

”Ami asina akordu ho SAMES atu formaliza servisu hamutuk entre UNFPA ho SAMES mak dahuluk  atu asegura supply ba ai-moruk no ekipamentu  para labele iha estock out no mós atu ajuda hadi’a kontrasepsaun ba planeametu familiár,’’dehan Asistente Reprezentante UNFPA iha Timor-Leste, Domingos Bernardo, hafoin asina MoU ho SAMES, iha Kampung-Alor Dili, kinta ne’e.

Kada tinan UNFPA aloka orsamentu husi rihun 300 to’o 400 ba programa kontrasepsaun planeamentu familiár.

“Ba tinan 2020, ami  aloka rihun $ 400-resin  ba kontrasepsaun  planeamentu familiár,  sasn sira ne’e sosa ona husi Xina, Dinamarka no seluk tan  mak sira haruka mai (Timor-Leste),”tenik tan.

Nia hateten UNPFA prontu atu apoiu Ministériu Saúde bainhira atu halo revisaun ba programa planeamentu familiár.

Iha fatin hanesan Diretór Ezekutivu SAMES, Santana Martins, hateten prosesu dezenvolvimentu setór saúde bazeia ba vizaun Minsitériu Saúde nian mak oinsá povu saudavel iha Timor-Leste.

SAMES hanesan orgaun autónomu ida ne’ebé hatuur ona iha dekretu lei 18 /2015, 24 juñu ho ninia kompetensia mak oinsá halo akizasaun armazenamentu no distribuisaun ba medikamentu konsumiveis, ekipamentu saúde no farmasistiku tomak iha Timor-Leste.

”Ohin loron fó oportunidade di’ak ba UNFPA ho SAMES atu haree servisu hamutuk ne’e ba oin  oinsá liliu iha asuntu planeamentu  familiár  nian no loke dalan mós  hodi haree servisu  sira seluk no ita mós asina akordu ne’e oinsá iha kooperasaun ne’ebé mak di’ak liután ba iha futuru,’’nia hateten.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here