Logotipu PDHJ

DILI, 23 jullu 2020 (TATOLI) – Provedoria Direitu Umanu no Justisa (PDHJ) rejista infrasaun aktu violasaun direitu umanu hamutuk lima (5) no Governasaun ladi’ak lima (5) ne’ebé komete hosi autoridade seguransa no ajente administrasaun públika.

Notísia Relevante : PDHJ Fó Formasaun Direitu Umanu Ba Membru F-FDTL

Provedora Direitu Umanu no Justisa (PDHJ), Jesuína Maria Ferreira Gomes. Imajen/TATOLI

Liuhosi lansamentu relatóriu trimestral hosi abríl-jullu, tinan ne’e, ohin, iha salaun PDHJ, Caicoli, Dili, Provedora Jesuína Maria Ferreira Gomes, informa, durante fulan tolu ne’e PDHJ  rejista keixa hamutuk 33 no liuhosi investigasaun konklui katak iha keixa 10 mak iha duni violasaun, kompostu hosi violasaun direitu umanu lima  no violasaun ba  boa-governasaun lima.

Nia hateten, infrasaun ba aktu violasaun direitu umanu mak halo agresaun fíziku, direitu liberdade integridade no seguransa liu-liu tratamentu kruél no direitu propriedade ne’ebé komete hosi membru Polísia Nasionál Timor-Leste (PNTL) balun no professor hasoru estudante iha eskola.

Tuir relatóriu PDHJ rejista keixa hosi komunidade hosi Munisípiu Ainaro ida (1), Baucau (rua), Dili (1).

“Relatóriu investigasaun ne’e konklui katak, halo duni violasaun ba direitu liberdade no integridade seguransa hodi akontese tratamentu kruél ka la umanu no direitu proprietáriu privada,” hateten Jesuína Ferreira.

Provedora Jesuína Ferreira, rekomenda ba Ministériu Interior no Komandu Jerál PNTL atu reforsa kapasidade PNTL liuhosi formasaun, liu-liu kona-ba direitu umanu, hodi nune’e, iha terrenu halo prevensaun ba krime nafatin respeitu prinsípiu direitu umanu.

Ba Ministériu Edukasaun, Komisaun Funsaun Públika (CFP), MSSI no Komisaun Nasionál Direitu Umanu, PDHJ rekomenda atu oinsá reforsa kapasidade professor sira liuhosi formasaun no diseminasaun kona-ba kódigu étika, responsabilidade no mós direitu umanu.

Jesuína Ferreira mós husu ministériu tutela no komandu jerál atu instaura prosesu disiplinár hasoru membru no professor sira ne’ebé pratika aktu violasaun direitu umanu.

Provedora PDHJ hateten ,kona-ba boa-governasaun  liu-liu ho sistema kontrolu ne’ebé la efetivu no efikás, abuzu podér, uza funsaun públiku hodi hetan benefísiu ne’ebé la iha direitu ka kauza prezuiju ba ema seluk, ilegalidade bazeia ba materiál, inkompeténsia absoluta ne’ebé akontese iha Ministériu Finansas liuhosi Diresaun Servisu Aduaneira, Ministériu Obras Públika, Administrasaun Suku iha Munisípiu Bobonaro no Liquiça no Komandu PNTL Munisípiu Manatuto.

Iha fatin hanesan reprezentante Komandu Jerál PNTL, Superintendente Xefe, José Soares, apresia ho relatóriu PDHJ nian no hein katak ho rekomendasaun hirak ne’e bele hadi’a liu tan instituisaun ne’e ba oin.

Serimónia lansamentu relatóriu trimestral hosi PDHJ ne’e partisipa hosi Vise Ministru Administrasaun Estatál (MAE), Lino de Jesus Torezão, reprezentante Ministériu Finansas, Ministériu Edukasaun, Ministériu Obras Publika no seluk tan.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here