Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/Egas Cristovão

DILI, 23 jullu 2020 (TATOLI)-Provedora Direitu Umanu no Justisa (PDHJ), Jesuína Maria Ferreira Gomes, konsidera la nesesáriu atu kriminaliza difamasaun no injure iha Timor-Leste.

Notísia Relevante : CNC Rekomenda Lei Kriminaliza Difamasaun Labele Sai Nu’udar Lei Krime

Jesuína Maria Ferreira Gomes hato’o lia hirak ne’e, ohin, ba Agêncía Tatoli iha nia servisu fatin,  hodi hato’o nia observasaun kona-ba esforsu Governu nian liuhosi Ministériu Justisa ne’ebé elabora no halo konsultasaun ba ezbosu Lei Kriminaliza Difamasaun no Injure.

Nia hateten, PDHJ hanesan instituisaun independente nia servisu hodi haree ba iha asuntu direitu umanu no boa-governasaun, iha kna’ar ida atu halo paresér fó opiniaun ba entidade públika Estadu nian kona-ba lala’ok sira ne’ebé akontese.

“Liga ho ezbosu Lei Kriminaliza Difamasaun , PDHJ halo ona nia kna’ar liuhosi haruka paresér ba iha Primeiru-Ministru, Prezidente Repúblika no Presidente Parlamentu Nasionál katak, la nesesáriu atu kriminaliza difamasaun no injuria,” informa Provedora PDHJ, Jesuína Maria Ferreira Gomes.

Nia esklarese tan, paresér ne’ebé PDHJ hato’o nia perspetiva direitu umanu no fundamentu sidadaun sira-nian tuir konstituisaun labele viola prinsípiu sira.

“PDHJ fó ona nia hanoin katak iha ita nia kódigu penál no kódigu sivíl iha artigu balun regula ona kona-ba aktu sira ne’ebé tama iha difamasaun ho injure nian. Tuir perspetiva PDHJ katak seidauk nesesáriu atu kriminaliza difamasaun ho injure,” afirma Provedora Jesuína Ferreira, hodi afirma tan, kompeténsia PDHJ fó paresér de’it, kabe ba kompeténsia governu oinsá atu kontinua ezbosu lei ne’e ka la’e.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here