Ministra Negósiu Estranjeiru no Kooperasaun, Adalgiza Albertina Xavier Reis Magno. Imajen Tatoli/Egas Cristovão

DILI, 22 jullu 2020 (TATOLI) – Ministra Negósiu Estranjeiru no Kooperasaun (MNEK), Adaljiza Magno, informa nia parte fó ona instrusaun ba Embaixada Timor-Leste iha Camberra, Austrália atu fó apoia ba traballadór sazonál timor-oan na’in-10 ne’ebé ahi-han apartamentu iha Bundaberg, Queensland.

“Ami halo instrusaun ba ita-nia Embaixada iha Cambera atu haree sira-nia situasaun tanba ne’e sira sei la susar,” tenik Ministra Adaljiza iha Palásiu Governu, kuarta ne’e. 

Ministra informa, daudaun ne’e Konsuladu Bundaberg fó ona fatin provizóriu ba sira atu hela no tau matan hela bainhira presiza ajuda.

“Ita-nia Embaixadór no Konsuladu Bundaberg ajuda ona no haree sira nia kartaun identidade balun  mak ahi-han  karik  hanesan pasaporte, ita-nia Embaixada bele apoia,” nia subliña.

Insidente ne’e akontese iha segunda (20/07), iha Bundaberg, Queensland, maibé komunidade Austrália hamutuk ona ho pesoál na’in hirak ne’e asegura katak sira di’ak de’it no hetan ona apoia.

“Fornese mós hahán ba sira no sira mós simu ona asisténsia hodi troka sira-nia kartaun banku nian no telemovel ne’ebé mak lakon tanba akontesimentu ne’e,” nia haktuir.

Austrália nia Departamentu Edukasaun, Kompeténsia no Empregu nian lidera daudaun hela asaun hodi responde no serbisu hamutuk mós ho empregadór sira hodi tulun pesoál traballadór hirak ne’e.

Nune’e mós, asisténsia fornese hosi servisu emerjénsia no Cruz Vermelha iha fatin refere. 

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here