Ministru Prezidénsia Konsellu Ministru, Fidelis Manuel Leite Magalhães, hasai fotografia ho jornalista Agência Tatoli hafoin halo entrevista, iha ninia knaar fatin, Palásiu Governu, kinta (23/07). Imajen/PCM

DILI, 23 jullu 2020 (TATOLI) – Loron 27 jullu ne’e Agência Tatoli kompleta ezisténsia tinan-haat nu’udar mídia Estadu, ne’ebé divulga notísia testu diáriamente liuhosi plataforma online ho lian tetum, portugés no inglés.

Iha aniversáriu ba dala-haat ne’e, Ministru Prezidénsia Konsellu Ministru, Fidelis Manuel Leite Magalhães, enkoraja Agência Tatoli kontinua hadi’a profisionalizmu jornalista sira nian, nune’e sira bele kapasitadu no bele iha esperiénsia ne’ebé di’ak hodi hakerek notísia sira no halo programa sira.

“Hakarak espresa ha’u-nia dezeju ba Tatoli, espresa katak ha’u iha mehi boot maka hatúr Tatoli ninia papél iha futuru. Tinan ne’e halo tinan-haat, ita bele dehan nurak hela maibé bainhira ita haree filafali buat balun ne’ebé mak Tatoli halo ona to’o ohin loron, ita nota katak iha melloramentu ba bebeik hosi loron ida ba loron seluk,” hateten Ministru Fidelis ba Agência Tatoli iha ninia knaar fatin, Palásiu Governu, kinta ne’e.

Ministru iha esperansa, mídia online ne’e bele prodúz jornalista hirak ne’ebé maka iha duni rekoñesementu nasionál no internasionál.

Portavóz Governu ne’e nota, aleinde publika ona notísia iha lian tolu, ein termu kualidade notísia ne’ebé publika hosi mídia online ne’e tenta atu verifika di’ak informasaun hosi fonte sira.

“Dadus ne’ebé maka fó mós ita bele verifika ninia fonte ho didi’ak no bele fiar fonte hirak ne’ebé maka Tatoli hatúr, entaun ida-ne’e ha’u hanoin loke dalan ba Tatoli atubele kontinua hetan konfiansa boot liután hosi públiku nasionál no mós iha futuru mai iha públiku internasionál tanba hanesan ajénsia notisioza nasaun nian, Tatoli iha papél ne’ebé importante atubele hatúr informasaun loloos hosi Timor-Leste ba mundu tomak,” nia subliña.

Governante ne’e dezeja susesu ba Agência Tatoli tanba bele fó informasaun ne’ebé di’ak ba rai-laran no rai-li’ur.

“Ba jornalista sira, liuliu foin-sa’e sira kontinua aprende, estuda maka’as, kontinua hadi’a imi-nia an hodi nune’e bele hadi’ak Tatoli no hadi’a kualidade imprensa iha Timor-Leste nian,” nia dehan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here