Governu liuhosi Sekretária Estadu ba Igualdade no Inkluzaun, Maria José da Fonseca Monteiro de Jesus, hamutuk ho parseiru sira bainhira lansa inisiativa Spotlight iha Otél Timor, fulan-marsu liubá.

DILI, 23 jullu 2020 (TATOLI) – Governu liuhosi Sekretária Estadu ba Igualdade no Inkluzaun, Maria José da Fonseca Monteiro de Jesus, hamutuk ho parseiru sira sei lansa inisiativa Spotlight iha munisípu tolu hanesan Vikeke, Ermera no Bobonaru.

Atividade ne’ebé hala’o ona iha munisípiu Bobonaru marka prezensa hosi delegasaun Uniaun Europeia, Organizasaun Nasoins Unidas (ONU), Prezidente Autoridade Munisípiu Bobonaru no Organizasaun Sosiedade Sivíl sira.

Tuir komunikadu ne’ebé TATOLI simu, ohin, hosi mídia Fundu Nasaun Unida ba labarik (UNICEF, sigla inglés) haktuir eventu ohin loron hanesan kontinuasaun husi lansamentu inisiativa spotlight ne’ebé hala’o ona iha nível nasionál ba munisípiu atu promove atividade rejionál nian ne’ebé antes ne’e difikulta ho pandemia COVID-19.

Lansamentu iha munisípiu Bobonaru atu hatudu, Estadu no parseiru sira iha esforsu atu responde ba violénsia hasoru feto no labarik-feto (VAWG-sigla Inglés) hanesan prioridade esensiál ida.

Lansamentu ba munisípiu rua seluk sei hala’o iha Ermera no Vikeke iha loron 6 fulan agustu 2020 no loron 13 agostu tinan 2020. Sekretária Estadu ba Igualdade no Inkluzaun mak sei lidera eventu hirak-ne’e ho kolaborasaun hamutuk ho reprezentante sira husi munisípiu, ONU, Uniaun Europeia no parseiru sosiedade sivíl sira. Inisiativa spotlight ne’e iha nível nasionál lansa ona iha loron 5 fulan-marsu 2020 iha Otél Timor-Dili.

“Ha’u rekoñese subtánsia husi esforsu sira atu halakon violénsia hasoru feto no labarik-feto maske ita iha difikuldade ba pandemia COVID-19. Inisiativa spotlight ne’e aliña ho kompromisu Governu Timor-Leste nian atu promove no proteje dignidade no direitu feto no labarik-feto sira”, katak Maria José Monteiro.

Nia hatutan: “Governu Timor-Leste komprometidu tebes ba zero toleránsia hasoru forma oioin no tipu violénsia saida de’it hasoru feto no labarik-feto. Ami nia apoiu sempre disponivel ba iha prevensaun, protesaun no prestasaun servisu atu asegura empoderamentu no partisipasaun feto sira iha aspetu hotu iha sosiedade”.

Eventu munisipál hirak-ne’e sai hanesan oportunidade ida atu hamosu inisiativa spotlight ne’e-rasik, atividade ne’ebé planeia ba munisípiu sira, nune’e mós parseiru xave, parte interesadu sira no apoiu sira ba iha komunidade. Inisiativa ne’e ho objetivu apoia sasukat sira Governu nian atu halakon forma hotu husi prátika perigu ba violénsia hasoru feto no labarik-feto sira. Investimentu tinan-tolu ba inisiativa spotlight iha Timor-Leste hamutuk 15 milaun dolár amerikanu.

Nota komunikadu ne’e hatutan objetivu seluk mak hametin enkuadramentu legál nasaun no instituisaun sira, halo promosaun ba norma positivu sosiál nian, hasa’e asesu hodi apoia serbisu ba sobrevivente husi violénsia, hadi’ak kolesaun no utilizasaun dadus ba iha halo polítika ne’ebé di’ak liu no hametin parseria ho organizasaun sosiedade sivíl sira.

Inisiativa ne’e lidera husi UN Women, Programa Dezenvolvimentu hosi Nasoins Unidas (PNUD, sigla portugés), UNICEF, Fundu Nasaun Naklibur sira/Nasoins Unidas ba Populasaun (UNFPA, sigla inglés) no Organizasaun Internasionál ba Traballadór sira (ILO, sigla inglés).

“Igualdade jéneru hanesan prekondisaun ida atu atinje Objetivu Dezenvolvimentu Sustentável. Inisiativa spotlight iha Timor-Leste signifika apoiu movimentu nasionál ida iha nível nasionál no munisipál ho promosaun abordajen multisetoriál ne’ebé parseiru hotu hamutuk atu fó liman ba malu atu halakon forma oioin husi violénsia hasoru feto no labarik-feto sira. Nasoins Unidas serbisu hamutuk ho ema no instituisaun barak, husi altu nível ba to’o povu kiik, inklui Governu, sosiedade sivíl, setór privadu, parseiru dezenvolvimentu, mane no labarik-mane sira, feto no labarik-feto sira atu halo mudansa loloos”, dehan Roy Trivedy, Koordenadór Rezidente ONU iha Timor-Leste.

Aleinde inisiativa spotlight iha Timor-Leste ne’ebé sei hetan impaktu iha nível nasionál, liuliu iha polítika, lejislasaun no apoiu ba iha instituisaun nasionál sira, atividade nível komunidade sei foka liu ba iha munisípiu tolu ne’ebé parseria ho sosiedade sivíl no organizasaun sira iha baze atu implementa programa ne’ebé fó prioritáriu liubá iha sobrevivente husi violénsia, feto foin-sa’e, feto no labarik-feto, ema ho defisiénsia, servisu na’in doméstika nian, komunidade LGBTI no feto sira ne’ebé kaben sedu (idade 18 mai kraik).

Inisiativa Spotlight hanesan parseiru tinan naruk entre Uniaun Europeia no ONU, ho ninia investimentu globál hamutuk 500 millaun EURO ka 550 millaun dolares amerikanu, ho objetivu halakon forma oioin husi violénsia hasoru feto no labarik-feto iha tinan 2030. Programa ne’ebé boot ba iha feto no labarik-feto sira. Iha Timor-Leste inisiativa ida-ne’e sei foka liu ba iha eliminasaun violénsia doméstika no violénsia parseiru íntimu.

“Ba Uniaun Europeia no nasaun membru sira, halakon violénsia hasoru feto no labarik-feto ne’e prioridade ida ne’ebé labele iha negosiasaun. Ita hotu hatene katak ita sei la hala’o ida-ne’e mesamesak. Persiza iha esforsu ne’ebé iha koordenasaun di’ak husi autór sira hotu: Governu Timor-Leste, organizasaun internasionál, lider polítiku, organizasaun sosiedade sivíl, ativista sira iha baze, feto no labarik-feto no- importante liu mak- mane no labarik-mane sira. Uniaun Europeia ho kontenti apoiu esforsu Timor-Leste nian atu halakon violénsia ne’ebé perigu tebes ba feto no labarik-feto sira. Inisiativa spotlight sei hasa’e esforsu no hametin instituisaun sira atu asegura feto no labarik-feto laiha tan moris iha ta’uk nia laran”, tenik Andrew Jacobs, Embaixadór Uniaun Europeia ba Timor-Leste. (ki)

HAKEREK NO HATÁN

Please enter your comment!
Please enter your name here