Prezidente Crus Vermelha Timor-Leste (CVTL), Madalena Hanjam. Imajen/Hortençio Sanchez.

DILI, 23 jullu 2020 (TATOLI)–Prezidente Crus Vermelha Timor-Leste (CVTL), Madalena Hanjam, hateten CVTL sei harii Hospitál Kruz Vermella iha Timor-Leste.

“CVTL iha ona hanoin  atu iha Hospitál Kruz Vermella iha Timor-Leste hodi fó atendementu ba komunidade sira, tanba ita-nia Hospitál Nasionál Guido Valadares (HNGV) defisil simu ema barak. Maibé ida-ne’e sei iha prosesu naruk ida, enatun CVTL buka dalan no meiu ida hodi hetan apoiu hosi liur no hosi ita-nia rai laran. Maibé, ida-ne’e ba longu prazu mak ami hanoin,” Prezidente Crus Vermelha Timor Leste (CVTL), Madalena Hanjam ba jornalista sira hafoin hala’o enkontru ho Vise Primeiru-Ministru iha Salaun MSSI, Caicoli, Dili, kinta ne’e. 

Nia dehan, asuntu ba kurtu prazu mak dada bee-moos ba komunidade sira iha área remota ne’ebé susar ba nesesidade bázika sira. Bee-moos ne’ebé mak Cruz Vermella dada ne’e, hemu kedas la presiza nono mak hemu ne’ebé hanaran sistema bem treinadu hosi Crus Vermelha Internasional. 

Tuir nia, durante tinan lima (5) nia-laran Crus Vermelha Timor-Leste  susesu ona ho projetu 120 iha territóriu Timor-Leste laran tomak.

Maibé, nia esplika, proposta sira kontinua sei mai barak tebes hosi komunidade sira iha área remota, ho nune’e CVTL husu Governu atu aloka osan millaun $2.

“Se millaun $2 ne’e mak transfere ona ba CVTL mak atividade integradu hotu sei hala’o iha territóriu Timor-Leste tomak. Hanesan dada bee-moos, hadi’a sanitáriu ho sanemantu no programa nutrisaun, haki’ak animál no mós halo uma ba kbiit laek sira,” nia dehan.

Prezidente CVTL ne’e hateten, proposta ne’e hatama kleur tiha ona entaun ho ida-ne’e nia parte husu ba Vise-Primeiru-Ministru se bele lori proposta ne’e ba iha asuntu Konsellu Ministru.

“Durante ami hala’o atividade, ne’e ami uza de’it duadór sira-nia osan. Entaun, ho ida-ne’e ami hakarak Governu ajuda ami ho millaun $2 hodi ami bele hala’o ami-nia atividade iha área remota,” nia hateten. 

Aleinde ida-ne’e, nia dehan, la’ós ba asuntu sosiais de’it maibé CVTL mós haree ba asuntu sosias seluk liga ho saúde hanesan komunidade ne’ebé mak hetan moras króniku sira hodi oinsá sira bele asesu ba iha klinika hodi simu asisténsia ba sira-nia saúde.

Jornalista : Osória Marques

Editór   :  Cancio Ximenes

HAKEREK NO HATÁN

Please enter your comment!
Please enter your name here