Xefe Suku Gugleur, Postu Administrativu Maubara, Munisípiu Liquiça, Guido Ramos Ribeiro. Imajen/Osória Marques.

DILI, 23 jullu (TATOLI)–Xefe Suku Gugleur, Postu Administrativu Maubara, Munisípiu Liquiça, Guido Ramos Ribeiro, hamutuk ho xefe aldeia haat (4) hasoru malu ho Vise Prezidente Ekipa Task Force COVID-19, Ministériu Solidaridade Sosiál no Inkluzaunhodi ko’alia kona-ba lista benefisiáriu sira ne’ebé mak nia naran la hakerek iha lista benefisiáriu nian no la simu subsídiu $200. 

Xefe Suku Gugleur, Guido Ramos Ribeiro, hateten benefisiáriu hosi aldeia haat (4) iha suku Gugleur mak naran la taka sai ka lakon totál no ho ida-ne’e mak nia parte mai iha nasionál hodi halo konfirmasaun parte kompetente.

Notísia Relevante: Iha Faze Rekonsiliasaun Dadus, MSSI Rejistu Reklamasaun Provizoriu 14.000-Resin

“Ohin, ha’u mai hamutuk ho xefe aldeia na’in-4 mai iha nasionál tanba osan subsídiu $200 ba ami-nia benefisiáriu ne’e laiha tanba naran la taka sai, nune’e ami mai para ko’alia hodi sira mós bele direitu ne’e,” dehan Xefe Suku Gugleur, Guido Ramos Ribeiro, ba jornalista sira hafoin hasoru malu ho Vise Prezidente ekipa task force COVID-19, MSSI, iha edifisiu MSSI, Caicoli, Dili, kinta ne’e. 

Nia informa, aldeia haat (4) iha suku Gugleur nian ne’ebé mak naran la taka sai maka hanesan Aldeia Lebulugor ho nia xefe família hamutuk 127, Aldeia Dair iha xefe família hamutuk 74, Aldeia Puquelete iha xefe família hamutuk 50, Aledia Lauvou iha xefe família hamutuk 85 inklui ho Aldeia Erito ema hamutuk na’in-10.

Ba asuntu ida ne’e, nia dehan, hein de’it rezultadu hosi Konsellu Ministru tanba dadus hirak ne’e sei iha faze verifikasaun no naran hirak ne’ebé la sai, kategória ba reklamasaun no konsidera sei hetan direitu hotu iha faze daruak nian.

Nia dehan, osan restu iha hela maibé haruka fila ona ba konta bankária Banku Nasionál Komérsiu Timor Leste (BNCTL) tanba laiha dalan legál ida hodi bele fahe osan ba benefisiáriu sira ne’ebé mka naran la sai iha lista pagamentu nian.

“Ami haree, ami-nia osan to’o hela ne’ebé ami hanoin atu selu hotu ba sira maibé laiha dalan atu selu osan ne’e ba sira entaun osan restu ne’e ami hatama fali ba BNCTL,” nia dehan.

Imajen/Osória Marques.

Hatán ba preokupasaun ne’e, Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hatete lista naran reklamasaun inklui ho aldeia no suku ne’ebé  mak naran la taka sai hosi munisípiu 12 inklui ho Rejiaun Administrativu Espesiál Oé-Cusse Ambeno (RAEOA), Governu sei konsidera hodi hetan subsídiu $200 ne’e.

“Ita konsidera ba naran reklamasaun sira ne’ebé mak iha ona, sira-nia direitu sei la lakon maibé bainhira atu halo pagamentu, nia tenke elizivél. Se la elizivél mak nia sei la hetan dieritu,” nia dehan. 

Tuir Diretór Jerál MSSI informa katak lista naran reklamasaun provizóriu hosi munisípiu 12 inklui ho RAEOA purvolta 14.175.

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here