Xefe Reprezentativu JICA iha Timor-Leste, Ko Goto. Imajen Tatoli/Jogerjo Guterres

DILI, 23 jullu 2020 (TATOLI) – Relasiona ho aniversáriu ba dala-haat Agência Tatoli ne’ebé sei monu iha loron 27 jullu ne’e, Ajénsia Kooperasaun Internasionál Japaun (JICA, sigla Inglés) iha Timor-Leste, felisita mídia Estadu ne’e no espera katak kontinua bele prodúz notísia pozitivu ba lee-nain sira iha rai-laran no rai-li’ur.

“Ami hakarak fó parabés ba Agência Tatoli iha aniversáriu tinan-haat ne’e no apresia inklui kontinua enkoraja servisu ho profisionál no sai di’ak liután iha futuru,” tenik  Xefe Reprezentativu JICA iha Timor-Leste, Ko Goto, ba Agência Tatoli iha ninia knaar fatin, kinta ne’e.

Biban ne’e, Ko Goto enkoraja mídia online ne’e hodi kontinua prodúz notísia sira ne’ebé pozitivu ba lee-nain sira.

“Ami mós apresia notísia sira ne’ebé períodikamente fó sai hosi Tatoli, liliu atividade JICA nian no ami apresia tebes tanba bele prodúz ona notísia iha lian inglés,” nia subliña.

Daudaun, mídia ne’ebé divulfa notísia liuhosi plataforma online ne’e, prodúz ona notísia ho lian tetum, portugés no inglés, maibé iha futuru sei prodúz tan ho lian indonézia.

Agência Tatoli hanesan Ajénsia Notisioza Estadu Timor-Leste ho estatutu Institutu Públiku, ne’ebé estabelese bazeia Dekretu-Lei númeru 21/2017, 24 maiu ne’ebé antes ne’e hanaran Agência Noticiosa Timor-Leste (ANTL) liuhosi Rezolusaun Governu númeru 9/2016, 14 marsu no bazeia ba desizaun Konsellu Ministru muda naran ba Tatoli iha loron 27 jullu 2016.

Jornalista: Florêncio Miranda Ximenes

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here