Prezidente CCI-TL, Oscar Lima, hamutuk estrutura dada-lia ho mídia nasionál sira hafoin enkontru ho Vise Primeiru-Ministru no Ministra Solidaridade Sosiál no Inkluzasaun, Armanda Berta dos Santos, iha salaun MSSI, Caicoli, tersa (21/07). Imajen/ Florêncio Miranda Ximenes

DILI, 21 jullu 2020 (TATOLI) – Vise Primeiru-Ministru (PM) no Ministra Solidaridade Sosiál no Inkluzasaun, Armanda Berta dos Santos konvoka enkontru ho Prezidente Kámara Komérsiu no Industria Timor-Leste (CCI-TL, sigla portugés), Oscar Lima ho ninia estrutura hodi diskute subsídiu porsentu 60 ba traballadór sira durante períodu Estadu Emerjénsia ba prevensaun surtu COVID-19.

“Ami hato’o kongratulasaun ba Vise Primeiru-Ministru no diskute ligasaun servisu hanesan  seguransa sosiál, liuliu ba subsídiu porsentu 60 ba traballadór ne’ebé balun sai ona benefisiáriu no balun seidauk,” tenik Prezidente CCI-TL, hafoin enkontru, iha edífisiu Ministériu Solidaridade Sosiál no Inkluzasaun (MSSI), Caicoli, tersa ne’e.

Tuir nia, Traballadór balun ne’ebé seidauk hetan subsídiu porsentu 60 tanba laiha sosializasaun másimu ba seguransa sosiál ne’ebé la konsege rejistu, maibé daudaun ne’e traballadór  barak hahú rejistu ona iha Institutu Nasionál Seguransa Sosiál (INSS).

“Traballadór ne’ebé la rejistu iha seguransa sosiál ne’e ita la konsege  selu subsídiu 60 tanba naran laiha iha INSS,” nia subliña.

Ho nune’e, Oscar Lima husu ba emprezáriu no traballadór sira atu rejistu no sai benefisiáriu seguransa sosiál.

“Ita nia Vise Primeiru-Ministru  responde ho di’ak no informa ba ami dehan daudaun INSS suspende pagamentu ba seguransa sosiál  tanba seidauk iha atividade ekonomia ne’ebé maka’as tanba surtu COVID-19,” Prezidente CCI-TL haktuir.

Tuir dadus CCI-TL hatudu katak traballadór  ne’ebé mak rejistu ona iha seguransa sosiál hamutuk 84.000 ho orsamentu ne’ebé akumula hamutuk miliaun $74.

Tinan ne’e, CCI-TL mós rejistu tan empreza foun hamutuk 9.000.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here