Situasaun bainhira motorista ida hetan prende hosi Polísia Trázitu iha arredór Palásiu Governu, tersa (21/07). Imajen/Antónia Gusmão

DILI, 21 jullu 2020 (TATOLI) – Polísia Nasionál Timor-Leste (PNTL), Unidade Tránzitu no Seguransa Sivíl destakadu iha Palásiu Governu prende motorista ne’ebé kondúz karreta prado ho xapa matríkula 04-969 G, ne’ebé tula asesór ho protokulu Vise-Ministru Obra Públika, Nicolau Lino Freitas Belo, tanba viola regra ne’ebé estabelese iha arreadór Palásiu Governu nian.

Tuir ajenda Gabinete Primeiru-Ministru (GPM), iha tersa ne’e Vise-Minitru Nicolau hala’o enkontru ho Primeiru-Ministru, Taur Matan Ruak, iha Palásiu Governu iha tuku 9 dader, tanba ne’e hafoin ramata enkontru karreta ne’ebé tula asesór ho protokolu governante ne’e ba tula hikas.

Maibé to’o iha portaun Palásiu Governu nian iha parte Akait nian, motorista ne’e hakilar malu ho seguransa sivíl sira tanba la autoriza motorista ne’e tama arredór Palásiu Governu, tanba karreta ne’ebé nia lori laiha stiker.

Tanba ne’e maka motorista tenta tama iha fatin ne’ebé mak bain-bain membru Governu sira nia karreta para.

Tuir observasaun jornalista Agência Tatoli iha terrenu, iha fatin akontesementu ne’e nota katak motorista ne’ebé mai tula asesór no protokolu Vise-Ministru Nicolau, kondúz karreta ho velosidade maka’as to’o halo seguransa sivíl sira no seguransa pesoál Xefe Governu nian hakfodak.

Hosi ne’e, seguransa sira halai tuir karreta ne’e no husu ba seguransa sira iha odamatan sai atu labele loke odamatan no seguransa inklui polísia tránzitu sira ne’ebé fó seguransa ba Xefe Governu nian mós ba hapara kedas karreta ne’e.

Bainhira la loke odamatan maka motorista no seguransa sivíl sira hakilar maka’as ba malu, maske nune’e motorista ne’e lakohi tun hosi karreta no tenta atu sai, maibé polísia pesoál no polísia tránzitu sira haruka nia tún hosi karreta no lori rezolve iha Palásiu Governu.

Hafoin ida ne’e, seguransa polísia tránzitu entrega motorista ne’e ba polísia tránzitu seksaun servisu investigasaun iha komandu munisípiu Dili, hodi submete ba prosesu investigasaun tanba konsidera funsionáriu ne’e dezobidiénsia ba regra no la respeitu pesoál seguransa ne’ebé maka asegura iha resintu Palásiu Governu.

Entretantu, tuir regulamentu ne’ebé estabelese iha Palásiu Governu, karreta ne’ebé atu asesu ba iha arredór tenki iha stiker ne’ebé atribui husi Ministériu Prezidénsia Konsellu Ministru no bainhira laiha maka labele tama.

Relasiona ho akontesementu ne’e jornalista Agência Tatoli tenta atu entrevista ho xefe seguransa sivíl iha Palásiu Governu maibé lakohi fó komentáriu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here