Enkontru entre Embaixadór Austrália ba Timor-Leste, Peter Roberts no Sekretáriu Estadu Formasaun Profisionál no Empregu, Alarico do Rosário no ekipa iha salaun SEFOPE, Caicoli, kuarta (22/07). Imajen/Natalino Costa

DILI, 22 jullu 2020 (TATOLI) – Embaixadór Austrália ba Timor-Leste, Peter Roberts, hala’o enkontru ho Sekretáriu Estadu Formasaun Profisionál no Empregu, Alarico do Rosário, no ekipa hodi ko’alia kooperasaun entre Governu Austrália no Timor-Leste, liu-liu kona-ba traballadór sira ne’ebé atu serbisu iha Austrália ho situasaun pandémia COVID-19.

Sekretáriu Estadu Alarico do Rosário, hateten tinan ida ne’e maski nasaun hotu enfrenta situasaun pandemia COVID-19, maibé Governu Austrália presiza tan traballadór timor-oan na’in-600 hodi ba serbisu maibé Governu Timor-Leste sei tetu didi’ak tanba sira sei ba tama kuarenta loron 14 no ema ida tenke selu $2.500.

“Ita sei tetu didi’ak tanba ema prontu foti ita-nia timor-oan hamutuk na’in-600 hodi serbisu ku’u haas, maibé ita mós tenke hasai osan tanba ita-nia ema mak bá, sei tama kuarentena durante loron 14 no ema ida selu $2.500. Ne’e ita hasai osan barak, ne’ebé presiza buka dalan molok sira bá tanba osan ne’e Estadu no nasaun nia tenke halo esforsu iha komunikasaun entre Governu ho Governu hodi hamutuk buka dalan,” dehan Sekretáriu Estadu ne’e hafoin enkontru iha salaun SEFOPE, Caicoli, kuarta ne’e.

Sekretáriu Estadu Formasaun Profisionál no Empregu, Alarico do Rosário. Imajen/Natalino Costa

Tanba ne’e, nia parte ohin husu ona ba Embaixadór Austrália katak ba oin Embaixada sei ba hato’o Govenu Austrália hodi buka dalan atu hatun folin tama kuarentena.

“Ha’u husu tulun ba Embaixadór Austrália katak folin kuarentena ba ema ida $2.500 ne’e karik bele hatun oituan, ne’ebé Embaixada dehan nia parte sei ko’alia no buka dalan hafoin ko’alia hamutuk,” nia akresenta.

Tuir planu, Governu Austrália presiza traballadór timor-oan ba serbisu hamutuk 5.000 to’o 10.000, tanba ne’e parte SEFOPE sei buka dalan hodi lori uluk traballadór na’in-600 hafoin seluk sei tuir.

Iha fatin hanesan, Embaixadór Austrália ba Timor-Leste, Piter Roberts, apresia sorumutuk ho Sekretáriu Estadu Alarico do Rosário ho ekipa, tanba antes ne’e Austrália serbisu hamutuk ona ho Timor-Leste liuhosi programa serbisu pasífiku, Seasonal Worker no Youth Employment Programme ba traballadór timor-oan sira no daudaun traballadór sira ne’ebé agora serbisu hela iha Austrália hamutuk 1.100.

Embaixadór Austrália ba Timor-Leste, Peter Roberts. Imajen/Natalino Costa

“Programa ne’e di’ak duni tanba to’os-nain iha Austrália depende ba traballadór timor-oan no parte seluk timor-oan sira bele hetan oportunidade iha Austrália hodi hetan rendimentu inklui esperiénsia foun. Ha’u-nia kompromisu nafatin serbisu ho Governu Timor-Leste, liu-liu SEFOPE atu kontinua  haforsa  programa ne’e,” nia akresenta.

Diplomata australianu ne’e dehan atu simu traballadór tinan ida ne’e hodi ba serbisu iha Austrália, prosesu sei kontinua maski agora difísil oituan tanba mundu hotu hasoru  pandemia globál no aeroportu hotu taka, maibé bainhira iha oportunidade Austrália sei presiza traballadór barak hosi Timor-Leste.

“Tanba ne’e Austrália sei kontinua serbisu hamutuk ho SEFOPE atu kontinua programa ne’e no ha’u espera katak programa ne’e sei kontinua ba futuru tanba programa ne’e di’ak ba Austrália no Timor-Leste,” nia subliña.

Tuir dadus hosi SEFOPE, hahú tinan-2014 to’o 2018, timor-oan hamutuk 2.819 maka serbisu ona iha Austrália liuhosi programa Seasonal Worker iha área ospitalidade no ortikultura no konsege rekolla retornu milliaun $9.698.579,15 mai Timor-Leste.

Iha tinan 2012 traballadór hamutuk 12, tinan 2013 traballadór na’in-36, 2014 ema na’in-131, 2015 na’in-181, 2016 iha traballadór na’in-298, 2017 na’in-782, 2018 ema na’in-1.380 no 2019 ema lima.

Iha área ortikultura traballadór mane hamutuk na’in-1.823 no feto 744, enkuantu iha ospitalidade mane 187 no feto 95, ne’ebé husi númeru ne’e traballadór balun serbisu repetidu to’o dala-haat hafoin kompleta serbisu ho durasaun fulan-neen, bazea ba prestasaun serbisu traballadór iha kompañia sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here