SEKoop sensibiliza Negosiante Ambulante hodi envolve iha atividade kooperativa. Imajen/Natalino Costa

DILI, 21 jullu 2020 (TATOLI) – Sekretaria Estadu Kooperativa (SEKoop), hahú inisiativa halibur negosiante ambulante sira atu envolve sira iha kooperativa, nune’e bele organizadu halo atividade negósiu.

Diretór Jerál Kooperativa SEKoop, Olderico Lopes, hateten ohin parte SEKoop hahú halibur negosiante ambulante hodi halo sosializaun envolve sira iha kooperativa atu nune’e negosiante sira bele halo sira-nia negósiu ho di’ak liután.

“Kooperativa ho mikro pequena empreza iha relasaun ba malu,  tanba ne’e maka ita buka fó treinamentu bázikú no sensibiliza nafatin ba sira hodi harii kooperativa grupu ka federasaun,” tenik Dirijente ne’e hafoin enkontru ho negosiante ambulante sira iha Fundasaun Hanai Malu, Tersa ne’e.

Diretór Jerál Kooperativa, Olderico Lopes. Imajen/Natalino Costa

Tuir Diretór Jerál Kooperativa ne’e, razaun negosiante sira tenke nakfila ba kooperativa tanba kooperativa ne’e hanesan institusaun ka organizasauun ne’ebé maka organizadu, atu nune’e Governu bele fasilita no fó asisténsia téknika ba sira hodi bele ajuda sustentabilidade negósiu ba oin.

“Diseminasaun ne’e ba dahuluk Sekretáriu Estadu Kooperativa, Elizário Ferreira buka empreza ki’ik sira ne’ebé namkari iha Timór laran tomak, liuliu iha tasi ibun no fatin sira seluk atu sai instituisaun ida ka organiza-an atu sai kooperativa, nune’e Governu bele kontrola no fó asisténsia ba sira,” nia akresenta.

Provizóriamente Negosiante Ambulante Na’in-111 Maka Interese Envolve Iha Kooperativa

Iha semana tolu liubá parte SEKoop hahú rejistra negosiante ambulante sira hamutuk 111.

“Númeru ne’e sei liu tanba negosiante ambulante ne’ebé durante ne’e fa’an iha tasi ibun no fatin seluk sei mai rejista  tanba iha interese ba inisiativa Governu atu envolve sira hodi asosia-an iha kooperativa, nune’e bele halo negósiu ho digu,” informa Diretór Jerál Kooperativa.

Tuir Dirijente ne’e, inisiativa ne’e Governu liuhosi SEKoop hakarak halo hodi hafasil kontrola negosiante ambulante tanba dalaruma bainhira sira iha estrada ibun ema mai duni tanba la organizadu.

“SEKoop sei koodena ho ministériu seluk atu jere negosiante sira-nia produtu ka sasán sai organizadu  hodi nune’e sira labele fa’an bá-mai no ema labele duni tan sira. Sekretáriu Estadu Elizário hakarak introdúz ida ne’e hanesan polítika VIII Governu Konstitusional,” dehan Olderico Lopes.

Kona-ba kestaun ne’e, parte Governu seidauk hanoin atu ajuda sira maibé bainhira negosiante sira halo ona atividade kooperativa, sira maka sei buka rasik tanba kooperativa ninia prinsípiu maka buka rasik.

“Governu nia knaar maka oinsá fó asisténsia no apoiu maibé depende mós orsamentu. Ne’e la fó apoia maibé iha posibilidade karik aban bain-rua asesu ba kréditu tanba asosiasaun ne’e Governu labele fó de’it maibé Governu bele reforsa sira-nia ativide,” nia subliña.

Negosiante Apresia Inisiativa SEKoop

Iha fatin hanesan, Negosiante Nuu, José das Neves, konsidera sensibilizasaun ne’e di’ak tanba Governu hahú hanoin halibur negosiante sira liuhosi atividade kooperativa, tanba ne’e nia parte apresia.

“Ami sei haree karik envolve-an iha kooperativa, ami sei akompaña esplikasaun didi’ak kona-ba asuntu ne’e,” tenik José das Neves.

Negosiante Nuu, José das Neves. Imajen/Natalino Costa

Tuir nia, sorumutuk ne’e nu’udar oportunidade di’ak ba hodi bele organiza-an.

“Loron ida ami hatama dolar hitu maibé bainhira ami fa’an nuu iha laran ho kréditu jurus ki’ik maka ami sei foti hodi hakbi’it ami-nia negósiu,” nia akresenta.

Negosiante ne’e husu ba SEKoop atu prepara fatin ho dignu ba negosiante nuu sira iha área Praia dos Coqueiros tanba Autoridade Munisípiu Dili no Taskforce bainhira halo operasaun tenke selu multa $9 to’o $45.

 “Husu Governu prepara fatin ba ami ne’ebé maka fa’an nuu iha Praia dos Coqueiros, nune’e ami bele halo negósiu ho digu,” dehan  Jose das Neves.

Nune’e mós, Negosiante Satorlina Maia, apresia inisiativa Governu atu halibur negosiante ambulante sira atu envolve-an iha atividade kooperativa, tanba ida ne’e maka bele konsentra negosiante sira iha fatin ida.

Negosiante Ambulante, Satorlina Maia. Imajen/Natalino Costa

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here