DILI, 22 jullu 2020 (TATOLI) – Atu halo prevensaun no kombate surtu COVID-19 iha Timor-Leste, Governu liuhosi Ministériu Saúde (MS) kontinua alerta timor-oan sira ne’ebé halo viajen hosi estranjeiru tenke kontinua kumpre prosesu konfinamentu obrigatóriu ka kuarentena durante loron 14, hafoin bele fila ba uma.
“Sidadaun ne’ebé maihosi rai-li’ur tenke tama iha kuarentena, maski sira hatudu rezultadu negativu ba COVID-19 tanba bele hetan kontaminasaun iha dalan bainhira halo viajen mai,” tenik Vise-Ministru Saúde, Bonifácio Maucoli dos Reis, iha Pálasiu Governu, kuarta ne’e.
Governante ne’e husu sidadaun sira atu kontribui kumpre regra konfinamentu obrigatóriu hodi prevene no kombate pandemia globál ne’ebé sei eziste iha nasaun barak.
“Kuandu ita-nia fatin la to’o, bele aluga tan fatin atu sidadaun sé de’it mak tama mai Timor-Leste bele tama iha kuaretena,”nia subliña.
Tuir dadus hosi MS, hosi 15 maiu hafoin ofisialmente kazu konfirmadu sira negativu, to’o ohin loron seidauk iha kazu foun ba COVID-19.
Totál komulativu ezame laboratóriu hamutuk 3.440 no totál komulativu rezultadu laboratóriu negativu 3.226.
Enkuantu totál ema ne’ebé liu ona períodu loron 14 kuarentena no konfinamentu obrigatóriu hamutuk 2.493, kompostu iha Dili 2.106 no iha munisípiu seluk 387.
Maski la rejista kazu ativu, Ministériu Saúde kontinua konsentra halo prevensaun no metigasaun COVID-19 iha territóriu, liliu iha Munisípiu Bobonaro, Covalima, Rejiaun Administrativa Espesiál Oé-cusse Ambeno (RAEOA) inklui Atauro no Dili.
Jornalista: Florêncio Miranda Ximenes
Editora: Julia Chatarina
