Portavós PNTL, Superintendente Xefe Arnaldo de Araújo. Imajen/Eugénio Pereira

DILI, 22 jullu 2020 (TATOLI)- Komandu Polísia Nasionál Timor-Leste (PNTL) Munisípiu Baucau halo ona intervensaun no atuasaun ba kazu konfrontu no sunu-uma ne’ebé akontese iha Aldeia Loirae, Suku Namanei, Postu Administrativu Quelicai, Munísipiu Baucau, sábadu (18/07).

Xefe Gabinete Relasaun Públika no Portavoz PNTL, Superintendente Xefe Arnaldo Araújo, informa kazu konfrontasaun ne’e akontese rezulta vítima ida kanek no uma-ida hetan sunu no sasán barak maka la konsege salva.

Superintendente Xefe Arnaldo hatutan, iha altura ne’ebé PNTL Baucau halo kedas atuasaun no oras ne’e daudauk lori ona suspeitu sira mai iha Komandu Munísipiu Baucau, atu nune’e, foti sira nia deklarasaun no halo prosesu tuir lei.

Daudaun ne’e iha fatin akontesimentu, situasaun seguransa kontinua la’o hakmatek no laiha problema ruma ne’ebé akontese ka seidauk iha informasaun ruma kona-ba envolvimentu membru Grupu Artes Marsiál.

Atu redús problema hirak ne’e polítika PNTL nian foka liubá Polisiamentu Komunitária hodi lori Polísia hakbesik ba povu hosi suku to’o nasionál no hamutuk ho komunidade sira atu bele redús problema.

“Orientasaun Komandu Jeral ba komandu munisípiu atu lori OPS sira hakbesik liu ba komunidade tanba sira maka nu’udar liman-ain, matan, tilun no ibun PNTL nian iha komunidade nia leet,” dehan Superintendente Xefe Arnaldo liuhosi karta komunikadu ne’ebé Agêncía Tatoli asesu hosi Komandu Jerál PNTL, ohin.

Iha parte seluk Portavós Komandu PNTL esplika, rezolusaun Governu hodi reativa Organizasaun Artes Marsiál liuhosi rezolusaun Governu Nu. 4/2020 maka Komandu PNTL husu ba GAM atu kontribui no kumpre regra ne’ebé iha, liu-liu oinsá atu reorganiza-an hodi ba rejistu fila-fali iha Komisaun Reguladóra Artes Marsiais (KRAM) atu nune’e bele hala’o hikas sira nia atividade tuir regra no prosedimentu ne’ebé Governu hatuur ona no bainhira la kumpre maka PNTL sei atua tuir Lei Nu.5/2017.

Tuir observasaun PNTL nian oras ne’e daudauk GAM balu kumpre, maibé balu maka seidauk kumpre maibé enjeral buat hotu la’o di’ak la hanesan uluk no PNTL hein hodi mantein nafatin situasaun hanesan ne’e hodi kria estabilidade.

PNTL sempre servisu hamutuk ho KRAM oinsá atu kria kondisaun di’ak no fornese informasaun ba GAM sira atu hala’o knaar tuir rezolusaun ne’ebé Governu hasai ona.

Nia informa mós katak komandante munisípiu sira halo ona enkontru ho GAM sira ne’ebé hala’o sira-nia atividade treinu atu mantein situasaun kalma no kondusivu. Organiza-an oinsá prepara nia membru sira atu bele kompete iha kompetisaun desportu iha nivel nasionál no international.

Antes termina Komandante ne’e apela ba juventude sira atu respeita malu no membru GAM sira atu fó liman ba malu hodi kria paz iha Timor-Leste.

Ema Na’in-Haat Mate no Na’in 29 Kanek

Iha parte seluk, Komandu PNTL mós atualiza situasaun seguransa Rodoviáriu katak kazu asidente ne’ebé akontese durante semana kotuk hamutuk 45 rezulta vítima na’in-29 kanek kmaan,  na’in-12 kanek todan no na’in-haat mate.

Asidente hirak ne’e akontese tanba fatór umanu no kondisaun estrada, tanba ne’e husu ba motorista sira bainhira kondús karreta ka motorizada tenke haree kondisaun transporte atu evita mosu asidente ne’ebé prejudika vida rasik no ema seluk nia vida.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here