Adidu Militár Repúblika Popular Xina ba Timor-Leste, Koronél Huang Damin, entrega prenda ba Segundu Komandante Jerál PNTL, Komisáriu Mateus Fernandes. Imajen/PNTL

DILI, 22 jullu 2020 (TATOLI)-   Komandante Jerál Polísia Nasionál Timor-Leste (PNTL), Komisáriu Faustino da Costa, hato’o agradese ba kontribuisaun servisu ne’ebé suporta hosi Adidu Militár Repúblika Popular Xina mai Timor-Leste, Koronél Huang Damin.

Notísia Relevante : Ministru Defeza TL Entrega Sertifikadu Apresiasaun Ba Adidu Militár Xina

Koronél Huang hetan fiar hosi Ministériu Defeza Xina hala’o misaun durante tinan haat liu iha Timor-Leste hodi kontribui no ajuda maka’as dezenvolvimentu  Instituisaun PNTL no FALINTIL-Forsa Defeza Timor-Leste (F-FDTL).

“Ami hato’o obrigadu barak no viajen di’ak bele hala’o knaar iha fatin foun ho envairomentu foun,” dehan Komisáriu Faustino liuhosi komunikadu imprensa ne’ebé Agênsia Tatoli asesu hosi Komandu PNTL.

Komandu PNTL espera Koronél  Huan Damin sei hala’o fila fali misaun foun iha Xina ho susesu liután.

“Susesór ba Huang Damin sei bele servisu hamutuk ho ita, atu nune’e, iha kooperasaun di’ak tanba PNTL nia Ofisiál balu kontinua hela estudu iha nasaun Repúblika Xina alende kursu no formasaun sira seluk ne’ebé la’o ho tempu badak ho ohin loron seidauk bele realiza tanba surtu COVID-19,” nia hateten.

“Despedida ida ne’e hala’o tanba ita hasoru malu hamutuk antes no iha koordenasaun servisu ne’ebé maka di’ak, maske serimónia ne’e simples, ami espera ita sei hanoin nafatin Timor-Leste no loron ruma ita sei fila-fali mai atu haree progresu ne’ebé maka PNTL atinje.”

Serimónia despedida ne’e kompleta ho entrega sertifikadu agradesimentu no entrega plaka hosi Komandante Jerál PNTL ba Koronél  Huang Damin.

Iha fatin hanesan, Adidu Defeza no Seguransa Xina, Huang Damin hato’o agradese ba kooperasaun servisu ho PNTL.

“Ha’u hala’o ona ha’u nia misaun iha Timor-Leste durante tinan haat (4) fulan ualu (8) nia laran. Tempu ne’e naruk iha ne’e Komandante PNTL na’in-rua maka troka malu ona lidera PNTL no Ministru Interior na’in tolu,” dehan Huang Damin.

Nia hatutan, mezmu mandatu remata ona, maibé sei iha adidu foun atu troka nia hodi kria nafatin kooperasaun hodi implementa programa sira ne’ebé tau ona iha ajenda hodi dezenvolve PNTL no F-FDTL.

“Kolaborasaun entre PNTL ho Polisia Xina no koordenasaun di’ak ho F-FDTL tanba ne’e ha’u hakarak hato’o obrigadu ba imi hotu nia suporta no koordenasaun servisu durante ha’u nia misaun iha Embaixada Xina no adidu foun ne’ebé troka ha’u sei kontinua kolaborasaun servisu ne’ebé hala’o tia ona,” nia agradese.

Antes ne’e, iha loron 9 jullu 2020, Ministru Defeza, Filomeno da Paixão de Jesus mós simu enkontru despedida hosi Adidu Militár Repúblika Popular Xina mai Timor-Leste, Koronél Huang Damin.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here