Presidente Institutu Nasionál Seguransa Sosiál (INSS) Longuinhos Armando. Imajen/Nelson de Sousa

DILI, 22 jullu 2020 (TATOLI)- Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite informa katak pagamentu 60% to’o agora seidauk selu hotu tanba traballadór purvolta 35.000 no governu selu ba kada konta bankária traballadór nian entaun governu foin mak selu traballadór hamutuk 4.000-resin.

“Ita selu kle’ur liu, tanba ita selu direita ba traballadór sira-nia konta bankária ida-idak nian nune’e seidauk bele hotu. Ita foin mak selu traballadór hamutuk 4.000-resin. Espera katak fulan rua mai tan bele finaliza ona pagamentu 60% ne’e”, dehan Prezidente Konsellu Administrasaun INSS, Longuinhos Armando Leite ba Agência TATOLI, iha nia knaar fatin Caicoli, Dili, kuarta ne’e.

Nia dehan, INSS halo pagamentu ba traballadór ne’e bazeia ba lei ne’ebé mak dehan tenke selu direita ba traballadór nia konta bankária, se bainhira selu ba kompaña entaun oras ne’e hotu ona tanba lais.

“Governu ta’uk atu selu direita ba kompaña tanba keta halo bá kompaña nia traballadór laiha mak sira rona governu ajuda mak sira mai rejistu. Maibé, ita mós tenke ajuda governu no asegura katak osan ne’e fatin ka ema ne’ebé mak merese duni atu hetan osan ne’e, tanba governu halo buat barak ona hanesan 60%, subdsídiu $200, governu prepara fasilidade iha saúde, edukasaun, agrikultura, protesaun sívíl”, nia dehan.

Nia hatutan, durante krize pandemia COVID-19 ne’e, governu hasai osan ba sasan hirak ne’e, tanba ne’e komunidade mós tenke ajuda governu liuhosi kreitériu SS nian.

Tuir lider másimu INSS ne’ekatak iha pandemia COVID-19, governu ajuda traballadór sira ho programa rua (2); ida mak 60% no seluk mak estende 6% ne’e ba fulan tolu (3) nian tanba baibain ne’e 10%, 6% mai hosi empregadór no 4% hosi traballadór nian.

“Durante krize ne’e, ita husu ajuda ita-nia kompaña sira atu labele kontribui lai 6% ne’e, maibé fulan tolu (3) hahú hosi abril-juñu, entaun fulan jullu agora sira tenke selu fali ona 10% ba governu tanba ho razaun katak ita-nia Estadu Emerjénsia liu tiha ona”, nia esplika.

Razaun seluk, nia dehan atividade kompaña la’o normál fali ona tanba ne’e mak sira tenke hahú fali ona sira-nia kontribuisaun ba iha Seguransa Sosiál (SS).

Kompaña hamutuk 2.000-resin ne’e kuaze hatama hotu ona kontrbuisan ba governu iha fulan jullu nia-laran ne’e. maibé ba kompaña foun sira ne’ebé mak rejistu ne’e seidauk bele selu.

Notísia relevante:MSS Halo Hela Rekonsiliasaun ba Dadus Relatóriu Subsídiu $200

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here