Inajeb/Media Gabinete PPN.

DILI, 22 jullu 2020 (TATOLI)—Prezidente Kámara Komérsiu Indústria (CCI-TL-sigla portugés), Oscar Lima, husu Parlamentu Nasionál (PN) atu kria lei ba kámara refere tanba durante ne’e hala’o kna’ar ho de’it rezolusaun.

“Ami husu tanba iha ami-nia rezolusaun, Governu fó ami-nia knaar liuhosi rezolusaun númeru 17/2012 iha ona maibé ami husu hasa’e rezolusaun ne’e ba lei ka dekretu-lei. Rezolusaun ne’e kona-ba kna’ar CCI-TL nian tanba CCI iha rai hotu-hotu ne’e iha lei, ita-nia sei rezolusaun hela,” dehan Oscar Lima ba jornalista sira, hafoin hala’o audiénsia ho Prezidente Parlamentu Nasionál, kuarta ne’e.

Notísia Relevante: CCI-TL Hato’o Preokupasaun Setór Privadu Ba PPN

Nia dehan, CCI-TL tenke hala’o knaar ho lei ka dekretu-lei tanba iha rai barak kámara komérsiu indústria moris ho lei la’ós ho rezolusaun Governu.

“Ami haruka ona advogadu no lakleur ami mai aprezenta iha ne’e nune’e parlamentu bele halo aprovasaun hodi sai lei, lalika sai rezolusaun. Prezidente parlamentu dehan prontu atu ajuda hodi buka solusaun,” nia dehan 

Entretantu, Prezidente Parlamentu Nasionál, Deputadu Aniceto Longuinhos Guterres Lopes, hateten iha CCI Indonézia nian iha lei tanba ne’e CCI-TL tenke iha instrumentu legál hodi atribui papél ba setór privadu timoroan sira.

“Kona-ba rezolusaun ne’e hasa’e ba lei ka dekretu-lei depende ba matéria ne’e tama eskluziva Governu nian, entaun Governu sei trata. Se matéria ne’e tama mai parlamentu, ami sei haree didi’ak no sei trata ho lei,” Aniceto Longuinhos Guterres Lopes hateten.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here