Parade ofisiaís F-FDTL. Imajen/TATOLI

DILI, 22 jullu 2020 (TATOLI)- Xefe Estadu Maiór Jenerál FALINTIL Forsa Defeza Timor-Leste (F-FDTL), Majór Jenerál Lere Anan Timur, informa ba Prezidente Repúblika (PR), Francisco Guterres katak, durante fulan hirak nia laran, membru forsa armada ne’ebé destaka iha fronteira, alende asegura área fronteira, membru sira mós ho inisiativa rasik halibur osan, hodi apoia komunidade kbiit-laek sira.

Lere Anan Timur hato’o asuntu ne’e durante enkontru semanál ho Xefe Estadu iha palásiu Prezidensiál Bairru-Pité, Dili, ohin.

“Ita-nia ofisiál F-FDTL sira iha área fronteira durante ne’e hola inisiativa hodi fó apoiu ba komunidade ho sira-nia osan rasik, hadi’a komunidade kbiit laek balun nia hela fatin, apoiu alimentasaun tuir sira-nia kbiit. Ha’u elojia sira apezar ofisiais jovens, sira iha inisiativa ne’ebé kapas tebtebes. Ha’u hateten ba sira katak, imi mai husi povu, imi povu nia oan, imi tenki hadomi povu”, Lere hateten ba jornalista sira, hafoin enkontru.

Kona-ba servisu sira F-FDTL nian, líder másimu forsa armada ne’e hateten, F-FDTL kontinua mantein nia postu sira iha área fronteira ne’ebé antes harii atu apoiu Unidade Patrullamentu Fronteira (UPF), hodi prevene entrada ilegál sira ne’ebé bele lori ameasa ba espansaun Covid-19 iha Timor-Leste.

Entretantu, dezde fulan marsu tinan 2020, Komandu FALINTIL-Forsa Defeza Timor-Leste, koloka pelotaun tolu iha postu seguransa sira iha fronteira mak hanesan Tilomar-Suai, Tunubibi-Bobonaru no Manduki-Bobonaru.

Oras ne’e daudaun, membru F-FDTL husi Unidade Polísia Militár ne’ebé destakadu iha postu seguransa tolu hanesan fronteira Tunubibi, Tilomar no Manduki nian kuaze ema na’in atus-ida.

Jornalista       : Cipriano Colo

Editór             : Rafy Belo

HAKEREK NO HATÁN

Please enter your comment!
Please enter your name here