Ministru Administrasaun Estatál, Miguel de Carvalho. Imajen Tatoli/Egas Cristovão

DILI, 21 jullu 2020 (TATOLI) – Ministru Administrasaun Estatál, Miguel Pereira de Carvalho atualiza progresu servisu ba Primeiru-Ministru (PM), Taur Matan Ruak, durante fulan-ida hafoin hala’o knaar inklui atualiza mós kona-ba progresu implementasaun polítika jestaun reziduo sólidu urbanu.

Iha loron 08 maiu 2019, Governu aprova prosesu aprovizionamentu ba implementasaun estratejia investimentu ba jestaun reziduo sólidu no iha loron 23 outubru 2019, kompañia TNA Solution aprezenta proposta investimentu privadu ba Konsellu Ministru kona-ba jestaun reziduo sólidu hodi bele halo resiklajen lixu iha kapitál Dili, maibé kona-ba proposta hosi kompañia internasionál ne’e seidauk iha desizaun.

“Politíka ne’e prevee sei monta kaixote lixu sira iha sidade dili no sei utiliza viatura hafoin bele karrega lixu ho kuantidade barak liu,” tenik Ministru Miguel Pereira iha Palásiu Governu, tersa ne’e.

Notisia Relevante: Governu Aprova Implementasaun Jestaun Rezídus Sólidus Iha Dili

Maski Governu iha ona sistema foun atu rekolla lixu, ne’ebé uza kontentór ho modelu veíkulu no ekipamentu móvel, no mós aumenta kualidade fatin soe lixu tuir padraun operasionál iha fatin soe lixu Tibar, maibé to’o agora seidauk iha alternativa atu transforma lixu sai produtu ne’ebé bele uza.

Governante ne’e dehan, implementasaun hosi politíka ne’e rasik iha ona Komisaun Nasionál Aprovizionamentu (CNA, sigla portugés) ba konkursu públiku ekipamentu sira ne’ebé mak presiza hodi halo melloramentu ba jestaun reziduo sólidu urbana Dili nian.

Daudaun ne’e tama ona iha faze avaliasaun dokumentu konkursu ho tipu ICB (International Competitive Bidding) ne’ebé mak fahe ba parte rua hanesan kolesaun ho transporte nian no ateru-kontroladu.

Ba implementasaun projetu ne’e, Governu aloka orsamentu ne’ebé tama iha verba Fundu Infraestrutura hamutuk millaun $18, ne’ebé fazeadamente aloka iha 2020 no aloka mós iha tinan 2021.

Iha Dili laran pur-volta kamioneta 50 maka loron-loron sirkula hodi tula lixu bá Tibar, ne’ebé loron ida tula dala rua ba parte dadeer no lorokraik ninian.

Projetu Atu Introdúz Modelu Foun Rekolla Lixu

Projetu ne’ebé hetan aprovasaun liuhosi desizaun Konsellu Ministru iha loron 8 maiu 2019, ho objetivu atu halo planu ba jestaun reziduo sólidu hodi propoin kona-ba modelu kontentór sira ne’ebé modernu no efisiente atu tau fo’er, karreta atu tula fo’er, ekipamentu móvel no ekipamentu ateru nian atu hadi’a padraun operasionál husi fatin soe fo’er nian iha Tibar.

Objetivu seluk tan husi planu ne’e atu hadi’a serbisu rekolla reziduo sólidu ne’ebé ba oin sei uza métodu rekolla mekánika.

Planu ne’e buka mós atu transforma fatin fo’er iha Tibar ba aterru-kontrolu ida, tuir estratéjia integrada kona-ba tratamentu ba fo’er sira.

Planu kona-ba implementasaun jestaun reziduo sólidu urbanu iha Dili, aprezenta katak benefísiu prinsipál husi planu ne’e mak hadi’a kualidade ambiente sidade, hadi’a saúde, hamenus risku inundasaun efisiénsia boot liután husi rekolla no jestaun rezídiu nian, liuhusi prátika nível internasionál nian.

Nune’e mós kria oportunidade empregu no posibilidade ba kreximentu turizmu nian liuhosi jestaun ne’ebé efikás no manutensaun ambiente nian.

Biban hanesan, Ministru Miguel Pereira, atualiza mós kona-ba funsionamentu regulár administrasaun lokál no funsionamentu munisípiu sira.

“Ha’u mai atualiza ba Primeiru-Ministru progresu servisu Ministériu Administrasaun Estatál (MAE) hafoin asume knaar fulan-ida. Progresu servisu sira ne’ebé maka iha relasaun ho funsionamentu regulár administrasaun lokál Estadu, funsionamentu munisípiu sira no relata mós servisu sira ne’ebé maka administradór sira halo iha munisípiu no mós medida sira ne’ebé mak ministériu foti atu regulariza funsionamentu administrasaun iha munisípiu,” nia realsa.

Nune’e mós, ko’alia mós kona-ba Programa Nasionál Dezenvolvimentu Suku (PNDS) ne’ebé mak Governu fó apoia orsamentu $40.000 to’o $60.000 ba autoridade komunitária sira iha suku bazeia ba sira-nia númeru populasaun suku sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here